पुणे शहरात सायबर फसवणुकीचे दोन मोठे प्रकार उघडकीस आले आहेत. यात एका ज्येष्ठ महिलेच्या बँक खात्यातून १०.५५ लाख रुपये, तर दुसऱ्या एका व्यक्तीच्या खात्यातून ३.८० लाख रुपये ऑनलाइन पद्धतीने चोरण्यात आले. दोन्ही प्रकरणांमध्ये अज्ञात सायबर चोरट्यांविरुद्ध ग
.
नऱ्हे येथील मानाजीनगरमध्ये राहणाऱ्या ६६ वर्षीय सेवानिवृत्त महिलेने याप्रकरणी नऱ्हे पोलीस ठाण्यात फिर्याद दिली आहे. चोरट्यांनी त्यांच्या बँक खात्याशी जोडलेल्या मोबाइल क्रमांकावर संपर्क साधला आणि गोपनीय माहिती मिळवली.
या माहितीचा गैरवापर करत चोरट्यांनी महिलेच्या खात्यातून १० लाख ५५ हजार रुपये काढून घेतले. प्राथमिक तपासानुसार, चोरट्यांनी महिलेचा मोबाइल हॅक करून ही रक्कम लांबवली असल्याचे समोर आले आहे. वरिष्ठ पोलीस निरीक्षक आत्माराम शेटे या प्रकरणाचा तपास करत आहेत.
दुसऱ्या एका घटनेत, गॅस पुरवठा खंडित करण्याची भीती दाखवून एका व्यक्तीची ३ लाख ८० हजार रुपयांची फसवणूक करण्यात आली. याप्रकरणी चतु:शृंगी पोलीस ठाण्यात गुन्हा दाखल करण्यात आला आहे.
औंध येथील डीपी रस्त्यावर राहणाऱ्या ४८ वर्षीय तक्रारदाराला काही दिवसांपूर्वी सायबर चोरट्यांनी मोबाइलवर संपर्क साधला. त्यांनी स्वतःला खासगी गॅस पुरवठा कंपनीचे प्रतिनिधी भासवले आणि थकित देयक न भरल्यास गॅस पुरवठा तात्काळ खंडित करण्याची धमकी दिली.
यानंतर चोरट्यांनी तक्रारदाराच्या बँक खात्याची माहिती मिळवून त्यातून ३ लाख ८० हजार रुपये काढून घेतले. गुन्हे शाखेच्या पोलीस निरीक्षक अश्विनी ननावरे या प्रकरणाचा तपास करत आहेत.
शहरात गॅस किंवा वीज पुरवठा खंडित करण्याची भीती दाखवून फसवणूक करण्याच्या घटनांमध्ये वाढ झाली आहे. नागरिकांनी अशा प्रकारच्या बतावणीकडे दुर्लक्ष करावे आणि कोणतेही देयक भरण्यापूर्वी संबंधित कंपनीशी खातरजमा करूनच व्यवहार करावेत, असे आवाहन पोलिसांनी केले आहे.
