![]()
अफगाणिस्तानमधून तस्करी केलेला बेदाणा थेट महाराष्ट्राच्या तासगाव आणि सांगली जिल्ह्यात आयात करण्यात आल्याची माहिती समोर आली आहे. सांगली व तासगाव येथील काही कोल्ड स्टोरेज मालकांनी चीनचा बेदाणा अफगाणिस्तान मार्गे सांगली जिल्ह्यात आयात केल्याचे उघडकीस आले
.
अफगाणिस्तानमधून तस्करी केलेला बेदाणा थेट सांगली आणि तासगावच्या कोल्ड स्टोरेजवर असल्याची माहिती मिळाल्यानंतर द्राक्ष बागायतदार संघाच्या पदाधिकाऱ्यांनी कोल्ड स्टोरेज आणि वॉशिंग सेंटरवर धाडी टाकल्या. अनेक ठिकाणी अफगाणिस्तानचा बेदाणा आढळून आला. तसेच वॉशिंग सेंटर आणि कोल्ड स्टोरेज चालकांनी बेदाणाबाबत अधिक माहिती देण्यास टाळाटाळ केली. दरम्यान, देशांतर्गत बेदाण्याचे दर पाडण्याचे षडयंत्र सुरू असल्याचे बोलले जात आहे.
देशातील बेदाणा उत्पादक शेतकऱ्यांना 300 ते 350 रुपये प्रति किलो भाव मिळत आहे. तेच चीनचा बेदाणा 150 ते 200 रुपये प्रति किलोने मिळत आहे. चीनचा बेदाणा आयात करून इथले दर पाडले जात आहेत. या संदर्भात माहिती मिळाल्यावर द्राक्ष बागायतदार संघाच्या पदाधिकाऱ्यांनी बटेजा आणि राधेय कोल्ड स्टोरेजवर धाड टाकून परदेशी बेदाणा आयात केल्याचे सिद्ध केले आहे. इतकेच नव्हे तर आयात केलेला स्वस्त आणि दर्जाहीन बेदाणा प्रोसेस करून भारतीय असल्याचे बनाव करून तो 350 ते 400 रुपये प्रति किलोने विकण्याचा डाव देखील उधळून लावण्यात आला आहे.
चुकीच्या पद्धतीने वागणाऱ्या व्यापऱ्यांना आम्ही बदडून काढू
स्वाभिमानी शेतकरी संघटनेचे जिल्हाध्यक्ष महेश खराडे यांनी थेट इशाराच दिला आहे. ते म्हणाले, पुढील काळात स्वाभिमानी गप्प बसणार नाही. चुकीच्या पद्धतीने वागणाऱ्या व्यापऱ्यांना आम्ही बदडून काढू, असा इशारा स्वाभिमानी शेतकरी संघटनेने दिला आहे. महेश खराडे म्हणाले, जिल्ह्यातील आणि राज्यातील शेतकऱ्यांना झळ बसत असेल ती खपवून घेतली जाणार नाही. अगोदरच दोन वर्षे द्राक्ष उत्पादक शेतकरी अडचणीत आहे. द्राक्ष बागा काढून टाकण्याचे सत्र सुरु आहे. ज्या शेतकऱ्यांकडे द्राक्ष आणि बेदाणा आहे त्यांना मात्र चांगला दर मिळत आहे.
कारवाई करावी, अन्यथा आंदोलन
पुढे बोलताना महेश खराडे म्हणाले, अशा परिस्थितीत तासगांव आणि सांगलीचे व्यापारी च त्यांच्या अन्नात माती मिसालण्याचा उद्योग करत असतील, तर आम्ही खपवून घेणार नाही. सांगली सोलापूर आणि विजापूर परिसरातील शेतकऱ्यांच्या जीवावर हे व्यापारी गब्बर झाले आणि त्यांच्याच जीवावर आता उठत असतील तर संघटना ते कदापी सहन करणार नाही. एका एकाला स्टोरेज मधून ओढून मारू पण शेतकऱ्यांना न्याय देऊ. बेकायदेशीरपणे बेदाणा आयात करून केमिकलची प्रक्रिया करून भारतीय पॅकिंगमध्ये विक्री केली जात आहे. यामुळे फसवणूक होत असून त्याचा फटका द्राक्ष बागायतदारांना बसत आहे. त्यामुळे या रॅकेटमध्ये सहभागी असणाऱ्या व्यापाऱ्यांवर कठोर कारवाई करावी, अन्यथा आंदोलन करण्याचा इशारा खराडे यांनी दिला आहे.
मुंबईत डिटर्जंट पावडर वापरुन बनावट दूध
मुंबईतील अंधेरी पश्चिम येथील कपासवाडी परिसरात बनावट दूध तयार करणाऱ्या एका धक्कादायक रॅकेटचा स्थानिक नागरिक आणि पोलिसांनी पर्दाफाश केला असून, डिटर्जंट पावडर, युरिया आणि रिफाईंड तेलाच्या साहाय्याने मानवी आरोग्यास घातक असे ‘पांढरे विष’ बनवले जात असल्याचे उघड झाले आहे. या कारवाईदरम्यान नामांकित कंपन्यांच्या दुधाच्या रिकाम्या पिशव्याही मोठ्या प्रमाणात जप्त करण्यात आल्या असून, या घटनेचा व्हिडिओ सध्या समाजमाध्यमांवर प्रचंड व्हायरल होत आहे. तथापि, या व्हायरल व्हिडिओची दखल घेत डी.एन. नगर पोलिसांनी स्पष्ट केले आहे की, हा व्हिडिओ जुना असून संबंधित प्रकरणावर यापूर्वीच कठोर कायदेशीर कारवाई करण्यात आलेली आहे.
