आगामी महापालिका निवडणुकीच्या पार्श्वभूमीवर महाविकास आघाडीकडून आता उमेदवारांच्या याद्या जाहीर केल्या जात आहेत. सोलापूरमध्ये शरद पवारांच्या राष्ट्रवादी कॉंग्रेस पक्षाने पहिली यादी जाहीर केली आहे. सोलापूरमध्ये राष्ट्रवादी कॉंग्रेस शरद पवार गटाला 20 जागा
.
सोलापूरमध्ये राष्ट्रवादी कॉंग्रेस शरद पवार गटाकडून प्रभाग क्रमांक 1 ड मधून राकेश मनोहर सोनी यांना उमेदवारी देण्यात आली आहे. प्रभाग क्रमांक 8 अ मधून मोहम्मद नकीब हासीब कुरेशी, प्रभाग क्रमांक 17 क मधून बिस्मिल्ला शिकलकर, प्रभाग क्रमांक 23 अ मधून सुनीता रोटे, प्रभाग क्रमांक 26 अ मधून नागिणी इरकशेट्टी, तर प्रभाग क्रमांक 18 क मधून अंबादास सोमण्णा नडगीरे यांना उमेदवारी देण्यात आली आहे.
कॉंग्रेसच्या अधिकृत उमेवाराचा एमआयएममध्ये प्रवेश
कॉंग्रेस पक्षाने सोलापूर आणि कोल्हापूर येथील उमेदवारांची यादी जाहीर केली असून कोल्हापुरात 48 तर सोलापूरमध्ये 20 उमेदवारांची पहिली यादी कॉंग्रेसने जाहीर केली होती. मात्र, सोलापूरमध्ये कॉंग्रेसला मोठा धक्का बसला आहे. पहिल्या यादीतील उमेदवाराने थेट एमआयएम पक्षात प्रवेश केला आहे. खासदार प्रणिती शिंदे यांच्या निकटवर्तीय समजल्या जाणाऱ्या फिरदोस पटेल यांनी एमआयएम पक्षात प्रवेश केल्याने अनेकांच्या भुवया उंचावल्या आहेत.
सोलापूरच्या प्रभाग क्रमांक 16 च्या कॉंग्रेसचे अधिकृत उमेदवार माजी नगरसेविका फिरदोस पटेल यांनी आज एमआयएममध्ये प्रवेश केला आहे. इच्छुकांची मुलाखत घेताना अपमानास्पद वागणूक दिल्याचे कारण फिरदोस पटेल यांनी पुढे केले आहे. एमआयएमचे प्रदेशाध्यक्ष फारूख शाब्दि आणि निरीक्षक अन्वर सादात यांच्या उपस्थितीत फिरदोस पटेल यांनी प्रवेश केला आहे. फिरदोस पटेल या कॉंग्रेस खासदार प्रणिती शिंदे यांच्या निकटवर्तीय मानल्या जातात. 2017 मध्ये सोलापूर महापालिकेत त्या निवडून आल्या होत्या.
