मनमाड नगरपालिकेच्या सार्वत्रिक निवडणुकीनंतर ईव्हीएम मशीन स्ट्राँग रुममध्ये ठेवल्या आहेत त्या परिसरात जामर लावावे, या मागणीसाठी उमेदवारांनी शुक्रवारी मध्यरात्रीपासून पालिकेच्या प्रवेशद्वारासमोर सुरू केलेले बेमुदत उपोषण सोमवारी स्थगित करण्यात आले.
.
सोमवारी दुपारी मनमाड पालिका प्रशासनाने याबाबत उपोषणकर्त्यांना लेखी पत्र दिले. तेथे सीसीटिव्हीसह आवश्यक त्या संरक्षणात्मक उपाययोजना केल्या आहेत. उमेदवारांना पहारा देण्यासाठी तेथे २४ तास बसण्याचीही व्यवस्था केलेली असल्याची माहिती या पत्रात दिली आहे. मात्र स्ट्राँग रूम परिसरात जामर बसवण्याबाबत सूचना नाहीत. त्यामुळे आपण केलेल्या मागणीनुसार अशी कारवाई करता येणार नाही अशी, भूमिका निवडणूक निर्णय अधिकाऱ्यांनी लेखी कळवली. मुख्याधिकारी शेषराव चौधरी यांनी हे पत्र उपोषणकर्त्यांना दिले. यानंतर उपोषण स्थगित करण्यात आले. परंतु पालिकेच्या या निर्णयामुळे समाधान न झाल्याने विविध राजकीय पक्षांच्या उमेदवारांनी या निर्णया विरोधात मंगळवारी उच्च न्यायालयात धाव घेण्याचा निर्णय घेतला.
२ डिसेंबरला मनमाड पालिकेची पंचवार्षिक निवडणूक झाल्यानंतर ईव्हीएम मशीन पालिकेच्या आययुडीपी विभागातील वाचनालय इमारतीतील स्ट्राँग रूममध्ये ठेवले आहेत. या परिसरात काही संशयास्पद हालचाली आढळून आल्याने येथे जामर बसवण्याची उमेदवारांनी लेखी पत्राद्वारे पालिकेकडे केली होती. तीन दिवसांपूर्वी हे निवेदन दिले होते. मात्र त्याची दखल घेतली न गेल्याने सर्वपक्षीय उमेदवारांनी शुक्रवारी मध्यरात्रीपासून पालिका प्रवेशद्वारासमोर प्राणांतिक उपोषण सुरू केले होते. सोमवारी दुपारी पालिका मुख्याधिकारी शेषराव चौधरी यांनी उपोषणकर्त्यांची भेट घेत निवडणूक निर्णय अधिकाऱ्यांचे पत्र उबाठाचे नाईक यांना दिले.
