निदाची ओळख कुणी करून दिली? या प्रश्नावर मतीनचे माैन:पंधरा दिवसांत 3 वेळा नाशिक पोलिसांकडून चौकशी
बहुचर्चित कॉर्पोरेट जिहाद प्रकरणाला आता खळबळजनक वळण मिळाले आहे. या प्रकरणातील निदा खान हिला आश्रय देणारा एमआयएमचा नगरसेवक मतीन पटेल याची एसआयटीचे सहायक आयुक्त संदीप मिटके यांनी सलग १० तास मॅरेथॉन चौकशी केली. प्रश्नांच्या भडिमारामुळे मतीन घामाघूम झाला. या संपूर्ण चौकशीत पोलिसांनी एकाच प्रश्नावर जोर दिला ‘तुला निदाची ओळख कुणी करून दिली?’ मात्र, या प्रश्नावर मतीनने बराच वेळ मौन बाळगल्याने पोलिसांचा संशय आणखी बळावला आहे. नगरसेवक असलेल्या मतीनला छत्रपती संभाजीनगरहून पंधरा दिवसांत ३ वेळा नाशकात बोलावून प्रश्चांची सरबत्ती करण्यात येत आहे. गुरुवारीही मतीन सकाळी ११ वाजता नाशिक पोलिस आयुक्तालयात हजर झाला. तेथून त्याला अत्यंत गोपनीय पद्धतीने तत्काळ सायबर पोलिस ठाण्यात नेण्यात आले. मतीनच्या मोबाइलमधील डिलीट केलेला डेटा आणि काही संशयास्पद चॅट्स समोर ठेवून त्याला बोलते करण्याचा प्रयत्न केला. सुरुवातीला त्याने उडवाउडवीची उत्तरे दिली. मात्र, पोलिस अधिकाऱ्यांनी जेव्हा तांत्रिक पुरावे समोर ठेवले, तेव्हा त्याचे धाबे दणाणले, अशी माहिती सूत्रांनी दिली. दरम्यान, गरज पडल्यास त्याची पुन्हा चौकशी होऊ शकते, अशीही माहिती समोर येत आहे. निदा प्रश्नावर निरुत्तर या प्रकरणाचा केंद्रबिंदू ठरलेल्या निदा खानभोवती तपासाची चक्रे फिरत असून पोलिसांनी ‘थेट निदाशी संपर्क कसा आला?’ या प्रश्नावर वेगवेगळ्या बाजूंनी मतीनला घेरले. एकाच प्रश्नाचा भडिमार होत असल्याने मतीनच्या चेहऱ्यावरील रंग उडाला. त्याने ‘काहीच आठवत नाही, कुणाचा फोन आला हे आठवत नाही’ असे सांगून प्रश्नांची उत्तरे देणे टाळले.
