उन्हाळ्यात महिलांमध्ये 'यूटीआय'चा धोका वाढला:ओले कपडे, लघवी रोखणे ठरू शकते घातक; स्त्रीरोग तज्ज्ञांचा इशारा
उन्हाळ्याच्या सुट्ट्यांमध्ये प्रवास आणि जलक्रीडांमुळे महिलांमध्ये युरिनरी ट्रॅक्ट इन्फेक्शन (यूटीआय) चा धोका वाढला आहे. प्रवासात लघवी रोखून धरणे, ओल्या कपड्यांमध्ये जास्त वेळ राहणे आणि कमी पाणी पिणे ही या संसर्गाची प्रमुख कारणे आहेत. स्त्रीरोग तज्ज्ञ डॉ. कैशरीन खान यांनी महिलांना या काळात विशेष काळजी घेण्याचा सल्ला दिला आहे. डॉ. खान यांच्या मते, महिलांचा मूत्रमार्ग लहान असल्याने जीवाणूंना मूत्राशयापर्यंत पोहोचणे सोपे होते. प्रवासात स्वच्छ स्वच्छतागृहांच्या अभावी अनेक महिला लघवी रोखून धरतात, ज्यामुळे जीवाणू शरीरात वाढतात. पोहल्यानंतर ओल्या स्विमसूटमध्ये जास्त वेळ राहिल्याने जननेंद्रियांच्या भागात दमट वातावरण निर्माण होते, जे जीवाणूंच्या वाढीस पोषक ठरते. उन्हाळ्यात जास्त घाम येणे आणि पुरेसे पाणी न पिण्यामुळे शरीरात पाण्याची कमतरता (डिहायड्रेशन) होते. यामुळे लघवीचे प्रमाण कमी होऊन शरीरातील जीवाणू बाहेर टाकण्याची नैसर्गिक प्रक्रिया मंदावते. घट्ट कपडे परिधान करणे आणि अस्वच्छ सार्वजनिक स्वच्छतागृहांचा वापर करणे यामुळेही संसर्गाचा धोका वाढतो. यूटीआयची प्रमुख लक्षणे खालीलप्रमाणे आहेत: लघवी करताना तीव्र जळजळ किंवा वेदना होणे, वारंवार लघवीची भावना होणे, दुर्गंधीयुक्त किंवा फेसाळ लघवी होणे आणि ओटीपोटात व पोटाच्या खालच्या भागात वेदना जाणवणे. या संसर्गापासून बचाव करण्यासाठी डॉक्टरांनी काही महत्त्वाचे उपाय सुचवले आहेत. शरीरातील पाण्याचे प्रमाण टिकवून ठेवण्यासाठी महिलांनी दिवसाला किमान २ ते ३ लिटर पाणी पिणे आवश्यक आहे. तसेच, प्रवासादरम्यान किंवा इतर वेळीही जास्त वेळ लघवी रोखून ठेवणे टाळावे आणि नियमितपणे स्वच्छतागृहाचा वापर करावा. पोहून आल्यानंतर ओल्या कपड्यांमध्ये जास्त वेळ न राहता लगेचच अंग कोरडे करून कपडे बदलावेत. उन्हाळ्यात सैल आणि सुती अंतर्वस्त्रांचा वापर करावा आणि रासायनिक स्वच्छता उत्पादने टाळावीत. वैयक्तिक स्वच्छतेची विशेष काळजी घेणे महत्त्वाचे आहे. पोहल्यानंतर किंवा शारीरिक संबंधांनंतर लघवी केल्यास शरीरातील जीवाणू बाहेर टाकण्यास मदत होते.
