RCB Champions | RCB ला बॅक-टू-बॅक चॅम्पियन बनवणारे ‘हे’ ५ खरे हिरो माहिती आहेत का?
RCB Champions | आयपीएल 2026 च्या अंतिम सामन्यात रॉयल चॅलेंजर्स बेंगलुरु (Royal Challengers Bengaluru) संघाने दमदार कामगिरी करत गुजरात टायटन्स (Gujarat Titans) वर 5 विकेट्सने मात केली आणि सलग दुसऱ्या वर्षी विजेतेपद पटकावले. अहमदाबादमधील नरेंद्र मोदी स्टेडियम (Narendra Modi Stadium) येथे रंगलेल्या या अंतिम लढतीत फलंदाज आणि गोलंदाजांनी केलेल्या एकत्रित कामगिरीमुळे आरसीबीने इतिहास घडवला.
2024 पर्यंत आयपीएल ट्रॉफीपासून वंचित राहिलेला हा संघ आता अवघ्या दोन हंगामांत सलग दोन विजेतेपदे जिंकण्यात यशस्वी ठरला आहे. कर्णधार रजत पाटीदार (Rajat Patidar) यांच्या नेतृत्वाखाली संघाने सातत्यपूर्ण कामगिरी करत नवे पर्व सुरू केल्याची चर्चा क्रिकेट वर्तुळात सुरू झाली आहे.
नाणेफेक गमावल्यानंतर प्रथम फलंदाजीस उतरलेल्या गुजरात संघाला आरसीबीच्या गोलंदाजांनी सुरुवातीपासूनच रोखून धरले. निर्धारित 20 षटकांत गुजरातला 8 बाद 155 धावांपर्यंतच मजल मारता आली. भुवनेश्वर कुमार (Bhuvneshwar Kumar), जोश हेजलवुड (Josh Hazlewood) आणि रसिख सलाम दार (Rasikh Salam Dar) यांनी अचूक टप्प्यावर गोलंदाजी करत प्रतिस्पर्धी फलंदाजांना मोठी भागीदारी उभारण्यापासून रोखले.
156 धावांचे लक्ष्य गाठण्यासाठी मैदानात उतरलेल्या आरसीबीला सुरुवातीला काही धक्के बसले. मात्र अनुभवी विराट कोहली (Virat Kohli) याने जबाबदारी स्वीकारत नाबाद 75 धावांची खेळी साकारली. केवळ 42 चेंडूंमध्ये खेळलेल्या या धडाकेबाज डावामुळे आरसीबीने 18 षटकांत 5 विकेट्स गमावत विजय मिळवला. अंतिम सामन्यात कोहलीने आपल्या आयपीएल कारकिर्दीतील सर्वात वेगवान अर्धशतकही नोंदवले.
RCB Champions | सलग दुसऱ्या ट्रॉफीचे पाच प्रमुख नायक :
आरसीबीच्या या यशामध्ये अनेक खेळाडूंचे योगदान असले तरी पाच खेळाडूंनी संपूर्ण हंगामात विशेष छाप पाडली. भुवनेश्वर कुमारने आपल्या स्विंग गोलंदाजीच्या जोरावर पॉवरप्लेमध्ये 17 विकेट्स घेतल्या, तर संपूर्ण स्पर्धेत त्याने 28 बळी मिळवत संघाच्या विजयात मोलाची भूमिका बजावली. दुसरीकडे विराट कोहलीने एका शतकासह पाच अर्धशतकांच्या मदतीने 675 धावा केल्या. सलग चार मोसमांत 600 हून अधिक धावा करणारा तो पहिला फलंदाज ठरला.
कर्णधार रजत पाटीदारने 501 धावा करत फलंदाजीमध्ये महत्त्वाचे योगदान दिले, तसेच नेतृत्वाची जबाबदारी यशस्वीपणे पार पाडली. जोश हेजलवुडने दुखापतीतून पुनरागमन केल्यानंतर 13 सामन्यांत 15 विकेट्स घेत विरोधी संघांवर दबाव निर्माण केला. तर रसिख सलाम दारने 13 सामन्यांत 19 बळी घेत मधल्या षटकांत संघासाठी महत्त्वाची भूमिका बजावली. एकेकाळी विजेतेपदासाठी संघर्ष करणाऱ्या आरसीबीने आता सलग दोन ट्रॉफी जिंकत आयपीएलमध्ये आपले मजबूत वर्चस्व प्रस्थापित केले आहे. कोहलीचा अनुभव, पाटीदारचे नेतृत्व आणि गोलंदाजांची प्रभावी कामगिरी यामुळे हा विजय संघासाठी संस्मरणीय ठरला आहे.
