Hingoli Police Lodge FIR: 19.99 Lakhs Turmeric Theft

.

पोलिसांनी दिलेल्या माहितीनुसार, हिंगोली शहरालगत औद्योगिक वसाहतीमध्ये स्टार ॲग्रोवेअर हाऊसिंग मॅनेजमेंट कंपनीचे गोदाम आहे. या ठिकाणी शेतकरी तसेच कंपनीचा शेतीमाल ठेवण्यात येतो. गोदामाच्या सुरक्षेसाठी या ठिकाणी कंपनीचे कर्मचारी देखील तैनात आहेत.

दरम्यान, ता. 11 मे ते ता. 23 मे याकालावधीत चोरट्यांनी गोदामाचे शटर वाकवून गोदामातील हळदीचे पोते चोरले याची तपासणी करण्यात आली होती. यामध्ये कंपनीकडून सर्व गोदामातील शेतीमालाच्या पोत्यांची तपासणी करण्यात आली होती. त्यामध्ये गोदामातील 353 कट्टे कमी असल्याचे दिसून आले. या हळदीचे वजन 181 क्विंटल असून त्याची किंमत 19.99 लाख रुपये एवढी आहे.

या प्रकरणी कंपनीचे व्यवस्थापक किरण कवडे यांनी आज हिंगोली ग्रामीण पोलिस ठाण्यात तक्रार दाखल केली. यामध्ये चोरट्यांनी गोदामाचे शटर वाकवून हळदीचे पोते चोरून नेल्याचे तक्रारीत नमुद केले. यावरून पोलिसांनी चोरट्यां विरुध्द गुन्हा दाखल केला आहे. पोलिस निरीक्षक विष्णूकांत गुठ्ठे, उपनिरीक्षक राहुल घुले, जमादार सुधीर ढेंबरे यांच्या पथकाने तातडीने घटनास्थळी भेट देऊन पाहणी केली. उपनिरीक्षक घुले पुढील तपास करीत आहेत.

दरम्यान, एकाच वेळी चोरट्यांनी 353 कट्टे हळद पळविल्याची घटना संशयास्पद असून हळदीचे कट्टे पळवितांना कंपनीचे तैनात केलेले सुरक्षा रक्षक कुठे होते तसेच इतर कर्मचाऱ्यांच्या हा प्रकार कसा लक्षात आला नाही. याबाबत उलट सुलट चर्चा सुरु झाली आहे. या प्रकरणात आता पोलिसांनी त्या कालावाधीतील औद्योगिक वसाहतीमधील सीसीटीव्ही कॅमेऱ्यांचे फुटेज तपासणीचे काम सुरु केल्याचे सुत्रांनी सांगितले.