पद्मश्री पुरस्कार राष्ट्रसंताच्या ‘समाधी चरणी’ केला अर्पण:पद्मश्री जनार्दनपंत बोथे यांनी भावुक होत घेतले दर्शन
भारत सरकारच्यावतीने अतिशय प्रतिष्ठेच्या पद्मश्री पुरस्काराने सन्मानित होताच अखिल भारतीय श्रीगुरुदेव सेवा मंडळाचे सरचिटणीस जनार्दनपंत बोथे यांचे दिल्लीहून मंगळवारी मध्यरात्री एक वाजताच्या सुमारास गुरुकुंजात आगमन झाले. यावेळी त्यांनी हा पद्मश्री पुरस्कार राष्ट्रसंत तुकडोजी महाराज यांच्या समाधीचरणी अर्पण केला. त्यांनी भावुक होत दर्शन घेतले. वंदनीय राष्ट्रसंत तुकडोजी महाराज यांचे खासगी सचिव तसेच अखिल भारतीय श्रीगुरुदेव सेवामंडळाचे सरचिटणीस जनार्दनपंत बोथे (गुरुजी) यांना भारत सरकारतर्फे प्रजासत्ताक दिनाच्या पूर्वसंध्येला पद्मश्री पुरस्कार जाहीर झाला होता. हा पुरस्कार त्यांना अलिकडेच महामहिम राष्ट्रपती द्रौपदी मुर्मु यांच्या हस्ते सन्मानपूर्वक प्रदान करण्यात आला. देशाचे पंतप्रधान नरेंद्र मोदी प्रमुख उपस्थित होते. १९५० च्या दशकापासून जनार्दनपंत बोथे गुरुजी राष्ट्रसंत तुकडोजी महाराज यांच्या समवेत सेवा कार्यात सक्रियपणे सहभागी होते. राष्ट्रसंत तुकडोजी महाराजांच्या विचारांचा प्रसार व प्रचार अधिक व्यापक व्हावा, यासाठी गुरुकुंज आश्रमाच्या माध्यमातून बोथे गुरुजींचे योगदान अत्यंत मोलाचे ठरले आहे. या संपूर्ण कार्याची दखल घेत भारत सरकारने त्यांना हा पुरस्कार प्रदान केला. या पुरस्काराबाबत प्रतिक्रिया देताना बोथे गुरुजी यांनी हा सन्मान राष्ट्रसंत तुकडोजी महाराजांच्या चरणी अर्पण केला. त्यांच्या विचारांवर चालणाऱ्या अखिल भारतीय गुरुदेव सेवामंडळातील सर्व सेवाभावी कार्यकर्त्यांचा हा गौरव असल्याचे त्यांनी नमूद केले. त्यांचे कार्य आज अनेकांसाठी प्रेरणादायी ठरत आहे. राष्ट्रसंताच्या समाधीस्थळी पुरस्काराबाबत प्रतिक्रिया देताना त्यांनी सांगितले की, हा पुरस्कार अखिल भारतीय गुरुदेव सेवा मंडळाअंतर्गत राष्ट्रसंत तुकडोजी महाराज यांचे विचार व कार्य तळागाळापर्यंत पोहोचविण्याचे काम करणाऱ्या प्रत्येक गुरुदेवभक्ताचा आहे. प्रत्येक प्रचारकाचाही आहे. माझ्यासारख्या छोट्या माणसाला एवढ्या मोठ्या पुरस्काराने सन्मानित करण्यात आले. हे खरोखर मी माझे अहोभाग्य समजतो. त्याबद्दल त्यांनी भारत सरकारचे आभारही व्यक्त केले. दर्शन घेताना पाणावले डोळे,समाधानाचे सुख दिल्लीहून मंगळवारी मध्यरात्री एक वाजताचे दरम्यान बोथे गुरुजींचे गुरुकुंज आश्रम याठिकाणी आगमन झाले. त्यांनी त्याचक्षणी समाधीचे दर्शन घेत हा पुरस्कार समाधी चरणी अर्पण केला. त्यावेळी बोथे गुरुजी हे अतिशय भावुक झाले होते. त्यांचे डोळे अक्षरशः पाणावले होते.
