Manisha Hawaldar Sold NEET Questions, Burned Notes; Shocking Revelations

.

मिळालेल्या माहितीनुसार, मनीषा हवालदार या नॅशनल टेस्टिंग एजन्सी (NTA) मध्ये भौतिकशास्त्र विषयाच्या अधिकृत अनुवादक म्हणून कार्यरत होत्या. अधिकृत अनुवादक असल्याने त्यांच्याकडे प्रश्नपत्रिकेची माहिती आधीच उपलब्ध होती. मात्र, आर्थिक मोबदल्यासाठी त्यांनी मनीषा मांढरे नावाच्या दुसऱ्या आरोपीशी संगनमत केले आणि काही ठराविक विद्यार्थ्यांना प्रश्न पुरवले. मनिषा हवालदार यांना पुण्याच्या विशेष न्यायालयात हजर करून त्यांची ट्रान्झिट रिमांड घेण्यात आली असून, त्यांना २५ तारखेला दिल्ली न्यायालयात हजर केले जाण्याची शक्यता आहे.

पुरावे नष्ट करण्यासाठी ‘नोट्स’ जाळल्या

सीबीआयच्या तपासात एक अत्यंत धक्कादायक बाब समोर आली आहे. तपास यंत्रणांच्या हाती काही लागू नये, या उद्देशाने मनीषा हवालदार यांनी भौतिकशास्त्राच्या प्रश्नांच्या हाताने लिहिलेल्या सर्व ‘नोट्स’ जाळून टाकल्या. इतकेच नाही तर, मनीषा मांढरेसोबत केलेले व्हॉट्सॲप चॅटिंगही त्यांनी डिलीट केले आहे. विशेष म्हणजे, संशय येऊ नये म्हणून त्यांनी स्वतःच्या फोनऐवजी पतीच्या फोनचा वापर करून प्रश्नमालिका पुढे पाठवल्याचेही तपासात उघड झाले आहे.

स्मरणशक्तीच्या जोरावर मांढरेचा सीबीआयला चकवा

दुसरीकडे, या प्रकरणातील दुसरी महत्त्वाची आरोपी मनीषा मांढरे हिला १४ दिवसांची सीबीआय कोठडी सुनावण्यात आली आहे. मांढरेच्या चौकशीत तांत्रिक अडचणी येत असल्याने सीबीआय अधिकारीही चक्रावून गेले आहेत. कारण मनीषा मांढरेची स्मरणशक्ती अत्यंत तीक्ष्ण असल्याने तिला सर्व प्रश्न तोंडपाठ होते. त्यामुळे तिने लेखी स्वरूपात किंवा डिजिटल स्वरूपात कोणताही ठोस पुरावा मागे ठेवलेला नाही. पेपरफुटीतील अन्य एक आरोपी मनीषा वाघमारे हिने चौकशीत मांढरेचे नाव घेतल्यानंतर हे बिंग फुटले.

पुण्यातील या दोन महिलांच्या अटकेमुळे नीट पेपरफुटीचे रॅकेट किती खोलवर पसरले आहे, हे आता स्पष्ट होत आहे. सीबीआय आता या प्रकरणातील इतर आर्थिक व्यवहारांचा आणि या रॅकेटमध्ये आणखी किती मोठ्या नावांचा समावेश आहे, याचा तपास करत आहे.