महामंडळांना आमदारांनी बळकटी द्यावी:‘चौथा स्तंभ’ मजबूत करण्यासाठी पत्रकार, विक्रेत्यांचे साकडे, निर्णयाकडे लागले लक्ष
पत्रकार आणि वृत्तपत्र विक्रेत्यांच्या प्रश्नांकडे शासनाचे लक्ष वेधण्यासाठी अखिल भारतीय ग्रामीण पत्रकार संघाने पुढाकार घेतला आहे. संघाच्या शिष्टमंडळाने चांदूर-धामणगाव रेल्वेचे आमदार प्रताप अडसड यांची भेट घेत पत्रकार व वृत्तपत्र विक्रेत्यांसाठी शासनाने घोषित केलेल्या महामंडळांना बळकटी देण्याची मागणी केली आहे. प्रिंट मीडिया, इलेक्ट्रॉनिक मिडियाचे पत्रकार व संबंधित कर्मचारी तसेच वृत्तपत्र विक्रेत्यांच्या विविध प्रलंबित मागण्यांचे निवेदनही यावेळी सादर केले. या भेटीत आमदार प्रताप अडसड यांनी पत्रकार आणि वृत्तपत्र विक्रेत्यांच्या न्याय्य मागण्या प्राधान्याने सोडवण्यासाठी शासन स्तरावर पाठपुरावा करण्याचे आश्वासन दिले. लोकशाहीचा चौथा स्तंभ मजबूत राहण्यासाठी पत्रकारांच्या सुरक्षिततेसह त्यांच्या कल्याणासाठी ठोस उपाययोजना होणे आवश्यक असल्याचेही त्यांनी नमूद केले. वृत्तपत्र विक्रेत्यांसाठीचे स्वतंत्र पत्रकार महामंडळ व वृत्तपत्र विक्रेता महामंडळ बळकट करण्याची प्रमुख मागणी करण्यात आली आहे. या क्षेत्रातील सर्व घटकांना संस्थात्मक आधार मिळावा, अशी संघाची भूमिका आहे. १९९६ पासून जनसामान्यांच्या सेवेसोबत पत्रकारांच्या हितासाठी कार्यरत असलेल्या संघटनेच्या शिष्टमंडळात राष्ट्रीय अध्यक्ष मनोहर सुने, राष्ट्रीय कार्याध्यक्ष युसूफ खान, सुरेश सवळे, राष्ट्रीय कैलासबापू देशमुख, राजेंद्र भुरे, राष्ट्रीय चिटणीस अशोक पवार, प्रदीप जोशी, रवींद्र मेंढे, महिला मंच प्रदेशाध्यक्ष कांचन मुरके, सागर सवळे, प्रदेश सरचिटणीस राजेंद्र ठाकरे, जिल्हाध्यक्ष सुधाकर टिपरे, संतोष वाघमारे आदी उपस्थित होते.
