इर्विनमधील परिचारिकांचा संप तासाभरात स्थगित:पीडित परिचारिकेला न्याय मिळवण्याच्या मागणीसाठी आंदोलन
अमरावती: जिल्हा सामान्य रुग्णालयातील (इर्विन) परिचारिकांनी सोमवारी काम बंद आंदोलन केले. जीएमसीमधील एका पीडित परिचारिकेला न्याय मिळवून देण्याच्या प्रमुख मागणीसह इतर प्रलंबित मागण्यांसाठी हे आंदोलन पुकारण्यात आले होते. मात्र, तासाभरातच हे आंदोलन स्थगित करण्यात आले. प्रशासनाने मागण्या मान्य करण्यासाठी एक महिन्याचा कालावधी मागितला. या आश्वासनानंतर परिचारिकांनी आपले आंदोलन मागे घेतले. या आंदोलनाला इर्विन रुग्णालयासह डफरीन आणि सुपर स्पेशालिटी रुग्णालयातील परिचारिकांनीही पाठिंबा दिला होता. महाराष्ट्र गव्हर्मेंट नर्सेस असोसिएशनने या आंदोलनाची हाक दिली होती. असोसिएशनने ११ मे रोजीच आरोग्य उपसंचालकांना पत्र पाठवले होते. या पत्रानुसार, १७ मे पर्यंत मागण्या मान्य न झाल्यास १८ मे रोजी काम बंद आंदोलन केले जाईल, असे नमूद करण्यात आले होते. युनियनच्या अध्यक्ष वर्षा पागोटे आणि इतर पदाधिकाऱ्यांनी या पत्रावर स्वाक्षऱ्या केल्या होत्या.
