अजितदादांविषयी आक्षेपार्ह वक्तव्याचा दावा:रोहित पवारांच्या विधानानंतर राजकीय खळबळ; अमोल मिटकरींचा थेट इशारा
राष्ट्रवादी काँग्रेसमध्ये गेल्या काही दिवसांपासून सुरू असलेल्या अंतर्गत नाराजीच्या चर्चांना आता नवे वळण मिळाले आहे. शरद पवार गटाचे आमदार रोहित पवार यांनी केलेल्या एका दाव्यामुळे राज्याच्या राजकीय वर्तुळात मोठी चर्चा सुरू झाली आहे. अजित पवारांविषयी पक्षातीलच दोन वरिष्ठ नेते अत्यंत खालच्या भाषेत बोलत असल्याची एक ऑडिओ क्लिप समोर आल्याचा दावा रोहित पवार यांनी केला. या वक्तव्यानंतर राष्ट्रवादी काँग्रेसमध्ये पुन्हा एकदा तणावाचे वातावरण निर्माण झाल्याचे दिसून येत आहे. एका मुलाखतीदरम्यान बोलताना रोहित पवार यांनी हा खळबळजनक दावा केला. त्यांनी सांगितले की, अजित पवारांविरोधात बोलणाऱ्या दोन मोठ्या नेत्यांची ऑडिओ क्लिप पक्षातील काही महत्त्वाच्या व्यक्तींनी ऐकली आहे. सुनेत्रा पवार आणि पार्थ पवार यांनाही ही क्लिप ऐकवण्यात आल्याचे त्यांनी म्हटले. केंद्रीय निवडणूक आयोगाकडे पत्र पाठवण्यापूर्वीच राष्ट्रवादीतील एका नेत्याने ही क्लिप सुनेत्रा पवार यांच्यापर्यंत पोहोचवल्याचा दावाही रोहित पवार यांनी केला. या विधानामुळे पक्षातील अंतर्गत मतभेद पुन्हा एकदा उघडपणे चर्चेत आले आहेत. रोहित पवारांच्या या वक्तव्यानंतर अजित पवार गटातील माजी आमदार अमोल मिटकरी यांनीही जोरदार प्रतिक्रिया दिली. सुरुवातीला त्यांनी अशा ऑडिओ क्लिपबाबत शंका व्यक्त करत, राष्ट्रवादी काँग्रेसला जाणीवपूर्वक लक्ष्य केले जात असल्याचा आरोप केला. मात्र, जर खरोखरच अजित पवारांविषयी कोणी आक्षेपार्ह भाषेत बोलले असेल, तर त्याला माफी दिली जाणार नाही, असा थेट इशारा त्यांनी दिला. अजितदादांविषयी खालच्या पातळीवर बोलणारा नेता कितीही मोठा असला, तरी त्याला सोडणार नाही. त्याला व्याजासहित उत्तर दिले जाईल, असे स्पष्ट शब्दांत मिटकरी म्हणाले. दरम्यान, विधान परिषद अधिवेशनातील उपस्थितीच्या आकडेवारीमुळेही अमोल मिटकरी पुन्हा चर्चेत आले आहेत. सभागृहात शंभर टक्के उपस्थिती लावत त्यांनी पहिला क्रमांक मिळवला आहे. याबाबत बोलताना त्यांनी समाधान व्यक्त केले. शेतकरी आणि शेतमजुरांच्या प्रश्नांसाठी काम करण्याची जबाबदारी अजित पवार यांनी दिली होती आणि ती आपण प्रामाणिकपणे पार पाडल्याचे मिटकरी म्हणाले. मात्र, चांगली कामगिरी करूनही पुन्हा संधी न मिळाल्याची खंत त्यांनी व्यक्त केली. मेरीटमध्ये येऊनही परीक्षेला बसू दिले नाही, असे सांगत त्यांनी आपल्या राजकीय परिस्थितीची तुलना ‘नीट’ परीक्षा प्रकरणामुळे अस्वस्थ झालेल्या विद्यार्थ्यांशी केली. कथित ऑडिओ क्लिपवरून वाद राष्ट्रवादी काँग्रेसमध्ये सध्या सुरू असलेल्या या आरोप-प्रत्यारोपांमुळे पक्षातील अंतर्गत समीकरणांबाबत पुन्हा चर्चा रंगू लागली आहे. अजित पवारांविषयीच्या कथित ऑडिओ क्लिपवरून निर्माण झालेला वाद आगामी काळात आणखी वाढण्याची शक्यता व्यक्त केली जात आहे. एका बाजूला पक्ष एकसंध असल्याचे नेते सांगत असले, तरी दुसऱ्या बाजूला सुरू असलेल्या आरोपांमुळे कार्यकर्ते आणि राजकीय निरीक्षकांमध्ये संभ्रमाचे वातावरण आहे. त्यामुळे या प्रकरणात पुढे कोणती नवी माहिती समोर येते आणि पक्ष नेतृत्व काय भूमिका घेते, याकडे सर्वांचे लक्ष लागले आहे.
