योगी आदित्यनाथचे पंख कापण्याची तयारी पाहून शिस्त अणि संस्कार हरवल्या सारखे जाणवते  

भाजपच्या अंतर्गत गोटात सध्या जे काही चालले आहे, ते पाहून संस्कार आणि शिस्त या शब्दांची नवी व्याख्या लिहावी लागेल असे वाटते. दिल्लीची गुजरात लॉबी आणि लखनौचे योगी यांच्यातील हा सामना म्हणजे केवळ राजकीय संघर्ष नसून, तो एक सुसंस्कृत शीतयुद्ध आहे.

• मंत्र्यांची वानप्रस्थाश्रम अवस्था: उत्तर प्रदेशात सहा नवीन मंत्री बनून आठ दिवस उलटले, पण बिचाऱ्यांना अजून आपली खाती माहित नाहीत. योगी आदित्यनाथ यांनी फाईल अशी काही दाबून धरली आहे की, दिल्लीतून कितीही सल्ले आले तरी महाराज टस से मस व्हायला तयार नाहीत. मंत्रालयांच्या वाटपासाठी चक्क पंतप्रधान मोदींच्या परदेश दौऱ्यावरून परतण्याची वाट पाहावी लागते, यातच उत्तर प्रदेशच्या मुख्यमंत्र्यांची स्वायत्तता किती उरली आहे, हे दिसून येते. 
• वाघाचे दात काढण्याचा ‘बिहार पॅटर्न’: ज्याप्रमाणे बिहारमध्ये नितीश कुमार यांचे गृहखाते काढून घेऊन त्यांना रबर स्टॅम्प बनवण्यात आले, तोच प्रयोग आता उत्तर प्रदेशात राबवण्याचा अमित शहांचा विचार दिसतोय. योगींकडून गृहखाते (पोलीस) आणि PWD (मलाईदार खाते) काढून घेऊन ते आपल्या खास मर्जीतील भूपेंद्र चौधरी किंवा मनोज पांडे यांना देण्याचा दिल्लीचा घाट आहे. थोडक्यात सांगायचे तर, वाघाला फिरायला मोकळे सोडायचे, पण त्याचे दात आणि नखे आधीच काढून घ्यायची, अशी ही रणनीती आहे.
• उत्तराधिकारी की स्पर्धक?: मोदींनंतर कोण? या प्रश्नाचे उत्तर शोधताना अमित शहा आणि योगी आदित्यनाथ यांच्यात ज्या काही तलवारी उपसल्या गेल्या आहेत, त्या पाहून पार्टी विथ अ डिफरन्सचा प्रत्यय येतोच. गुजरात लॉबीला आता योगींचे वाढते वजन सहन होत नाहीये, म्हणूनच त्यांचे पंख कापण्याची मोहीम जोरात सुरू आहे.
• तिकीट वाटपाचे ‘पाप’ कोणाचे?: २०२४ च्या निवडणुकीत उत्तर प्रदेशात भाजपचा जो धुरळा उडाला, त्याचे खापर फोडण्यासाठी योगींनी दिल्लीकडेच बोट दाखवले आहे. ज्यांनी दिल्लीत बसून नावे ठरवली आणि ३५-४० उमेदवारांना मी ओळखतही नव्हतो, त्यांनीच आता पराभवाची जबाबदारी घ्यावी, असा रोखठोक टोला योगींनी लगावला आहे.
• नागपूरचा नवा घोडा: सर्वात जास्त बोचणारी गोष्ट म्हणजे आरएसएस (RSS) मध्येही आता अशी चर्चा सुरू झाली आहे की, १५ वर्षांनंतर आता गुजरात लॉबीचे सूर्यास्त होण्याची वेळ आली आहे. गुजरातच्या या जोडीवर डाव लावण्यापेक्षा आता योगींसारखा नवा आणि सशक्त घोडा शोधण्याची गरज संघाला वाटू लागली आहे, ज्यामुळे दिल्लीच्या तख्ताला घाम सुटणे स्वाभाविक आहे.

थोडक्यात काय, तर ज्या उत्तर प्रदेशने दिल्लीचे सिंहासन दिले, तेच उत्तर प्रदेश आता भाजपमधील अंतर्गत संघर्षाचा केंद्रबिंदू बनले आहे. योगी आपले हठयोग  सोडायला तयार नाहीत आणि शहा आपली चाणक्यनीती.  या ‘Friendly Match’ मध्ये कोणाचा बळी जातो, हे पाहणे रंजक ठरेल.