अमरावती विद्यापीठाच्या मॉडेल डिग्री कॉलेजच्या नवीन इमारतीचा कार्यारंभ:बुलढाणा येथे केंद्रीय मंत्र्यांच्या उपस्थितीत सोहळा

संत गाडगे बाबा अमरावती विद्यापीठाद्वारे संचालित मॉडेल डिग्री कॉलेज, बिरसिंगपूर, बुलढाणा येथील नवीन इमारतीचा कार्यारंभ आज, गुरुवार, १४ मे रोजी सकाळी ११ वाजता होत आहे. या सोहळ्याला केंद्रीय आयुष राज्यमंत्री प्रतापराव जाधव आणि राज्याच्या युवक कल्याण व क्रीडा राज्यमंत्री रक्षाताई खडसे प्रमुख उपस्थिती लावणार आहेत. हा विशेष कार्यक्रम मॉडेल डिग्री कॉलेज परिसर, अजिंठा रोड, ग्राम-बिरसिंगपूर, बुलढाणा येथे आयोजित करण्यात आला आहे. कुलगुरू डॉ. मिलींद बारहाते कार्यक्रमाच्या अध्यक्षस्थानी असतील. तसेच, महाराष्ट्र राज्याचे वस्त्रोद्योग मंत्री तथा बुलढाणा जिल्ह्याचे सहपालकमंत्री संजय सावकारे, मदत व पुनर्वसन मंत्री तथा बुलढाणा जिल्ह्याचे पालकमंत्री मकरंद जाधव (पाटील) आणि कामगार मंत्री तथा अकोला जिल्ह्याचे पालकमंत्री ॲड. आकाश फुंडकर प्रमुख अतिथी म्हणून उपस्थित राहतील. या कार्यारंभ सोहळ्याला मलकापूरचे आमदार चैनसुख संचेती, बुलढाण्याचे आमदार संजय गायकवाड, जळगाव जामोदचे आमदार संजय कुटे, चिखलीच्या आमदार श्वेता महाले, मेहकरचे आमदार सिद्धार्थ खरात, सिंदखेड राजाचे आमदार मनोज कायंदे, विधानपरिषद सदस्य किरण सरनाईक, वसंत खंडेलवाल व धीरज लिंगाडे यांनाही निमंत्रित करण्यात आले आहे. बुलढाण्याच्या नगराध्यक्ष पूजा गायकवाड, बिरसिंगपूरच्या सरपंच वैशाली शिंदे आणि विद्यापीठाचे प्र-कुलगुरु प्रा. डॉ. महेंद्र ढोरे यांचीही उपस्थिती राहणार आहे. विद्यापीठाचे कुलसचिव डॉ. अविनाश असनारे आणि मॉडेल डिग्री कॉलेज, बुलढाणाचे मानद संचालक डॉ. ए.आर. म्हळसने यांनी नागरिकांना या कार्यारंभ सोहळ्याला मोठ्या संख्येने उपस्थित राहण्याचे आवाहन केले आहे. बिरसिंगपूर येथे मॉडेल डिग्री कॉलेजची इमारत उभारण्याचे स्वप्न अनेक दिवसांपासून पाहिले जात होते. बुलढाणा आणि अकोला जिल्ह्यातील सिनेट व व्यवस्थापन परिषदेच्या सदस्यांनी विद्यापीठाच्या बैठकांमध्ये हा मुद्दा सातत्याने मांडला होता. या प्रकल्पात काही अडथळे आले असले तरी, आता हे स्वप्न पूर्णत्वास जात असल्याने दोन्ही जिल्ह्यांतील विद्यार्थी आणि पालकांमध्ये आनंदाचे वातावरण आहे.