'टोमॅटो देतो' असे सांगून घरात बोलावले अन्…:7 वर्षांच्या चिमुरडीवर 50 वर्षीय नराधमाकडून अत्याचार, नागरिकांनी रंगेहाथ पकडून दिला चोप

कल्याणमध्ये गुन्हेगारीच्या घटनांमध्ये वाढ झाली असून, एका 15 वर्षीय अल्पवयीन मुलीवरील अत्याचाराची घटना ताजी असतानाच आता आणखी एक संतापजनक प्रकार उघडकीस आला आहे. कल्याणमध्ये एका 50 वर्षीय नराधमाने अवघ्या 7 वर्षांच्या चिमुरडीवर लैंगिक अत्याचार केल्याची धक्कादायक घटना समोर आली आहे. कोळसेवाडी पोलिस ठाण्याच्या हद्दीत सलग दोन दिवसांत घडलेल्या या दुसऱ्या अत्याचाराच्या घटनेमुळे कल्याण परिसर हादरून गेला असून, नागरिकांमध्ये तीव्र संतापाचे वातावरण आहे. या घटनेबाबत मिळालेल्या माहितीनुसार, जुमेया अली शेख (वय 50) असे या आरोपीचे नाव आहे. या नराधमाने परिसरातीलच एका पीडित 7 वर्षीय चिमुरडीला ‘टोमॅटो देतो’ असे आमिष दाखवून फूस लावली. चिमुरडी त्याच्या बोलण्यावर विश्वास ठेवून घरात गेली असता, घरात कोणीही नसल्याचा गैरफायदा घेत या आरोपीने तिच्यावर लैंगिक अत्याचार केला. नागरिकांनी रंगेहाथ पकडून दिला चोप दरम्यान, या भयंकर प्रकाराची माहिती परिसरातील नागरिकांना मिळताच त्यांनी तातडीने आरोपीच्या घराकडे धाव घेतली. संतप्त नागरिकांनी आरोपी जुमेया अली शेख याला घरातच रंगेहाथ पकडले आणि त्याला बेदम चोप दिला. त्यानंतर नागरिकांनी तातडीने नराधमाच्या तावडीतून या चिमुरडीची सुटका केली. चिमुरडीवर उपचार सुरू, आरोपीला अटक या भयंकर प्रसंगानंतर मानसिक आणि शारीरिक धक्का बसलेल्या पीडित चिमुरडीला तातडीने रुग्णालयात दाखल करण्यात आले असून, सध्या तिच्यावर वैद्यकीय उपचार सुरू आहेत. या घटनेची माहिती मिळताच कोळसेवाडी पोलिसांनी तातडीने घटनास्थळी धाव घेत कारवाई केली. पोलिसांनी या प्रकरणी गुन्हा दाखल करून आरोपी जुमेया अली शेख याला बेड्या ठोकल्या आहेत.