Chandrakant Kaire Demand to Ban MIM Party Over Nida Khan Case

.

नाशिकमधील टीसीएस कंपनीतील धर्मांतरण प्रकरणात आरोपी असलेली निदा खान ही गेल्या काही दिवसांपासून पोलिसांना चकवा देत होती. नाशिक जिल्हा सत्र न्यायालयाने २ मे रोजी तिचा अटकपूर्व जामीन फेटाळला. अखेर गुरुवारी रात्री छत्रपती संभाजीनगरच्या नारेगाव परिसरातून तिला ताब्यात घेण्यात आले. आज तिला नाशिक न्यायालयात हजर केले असता, न्यायालयाने तिची ११ मे पर्यंत पोलिस कोठडीत रवानगी केली आहे.

‘एमआयएम’वर बंदी घाला; चंद्रकांत खैरेंची मागणी

ठाकरे गटाचे नेते आणि माजी खासदार चंद्रकांत खैरे यांनी या प्रकरणावरून एमआयएमवर थेट निशाणा साधला आहे. “ज्या भागातून निदा खानला अटक करण्यात आली, तिथे अनेक अवैध धंदे सुरू आहेत. एमआयएमचे माजी नगरसेवक मतीन पटेल आणि त्यांचे ‘बॉस’ इम्तियाज जलील यांनीच या मुलीला आश्रय दिला होता,” असा गंभीर आरोप खैरे यांनी केला. तसेच, एमआयएम पक्षावर बंदी घालण्यासाठी आपण मुख्यमंत्र्यांकडे पाठपुरावा करणार असून मतीन पटेल यांना तातडीने अटक करण्याची मागणीही त्यांनी केली.

हे तर मोठे आंतरराष्ट्रीय षडयंत्र – गोपीचंद पडळकर

भाजप आमदार गोपीचंद पडळकर यांनीही या प्रकरणात उडी घेत याला एक मोठे ‘षडयंत्र’ म्हटले आहे. सांगलीच्या जतमध्ये बोलताना पडळकर म्हणाले, “निदा खानला मदत करण्यात इम्तियाज जलील यांची मुख्य भूमिका आहे. ती संभाजीनगरमध्ये सापडणे हा योगायोग नसून नियोजित कट आहे. पोलिसांनी जलील आणि संबंधित नगरसेवकाची कसून चौकशी करावी.” तत्पूर्वी, राज्याचे मंत्री संजय शिरसाट यांनीही जलील यांच्यावर अशाच प्रकारचे आरोप केले होते.

इम्तियाज जलील यांचे प्रत्युत्तर

दरम्यान, मंत्री संजय शिरसाट यांनी केलेल्या आरोपांना इम्तियाज जलील यांनी फेटाळून लावले आहे. मंत्री संजय शिरसाट यांच्या टीकेला उत्तर देताना ते म्हणाले, “मी कोणत्याही पालकमंत्र्यांना कवडीचीही किंमत देत नाही.” आपल्यावर होत असलेले आरोप बिनबुडाचे असून हे निव्वळ राजकीय द्वेषातून केले जात असल्याचे त्यांनी स्पष्ट केले.

हे ही वाचा…