जि.प. कर्मचाऱ्यांच्या बदल्या 9, 10 मे रोजी:कृषी, पशुसंवर्धन, आरोग्य, वित्त, मबाक विभागांतील कर्मचाऱ्यांचा समावेश
अमरावती जिल्हा परिषदेतील कर्मचाऱ्यांच्या बदल्यांची प्रक्रिया ९ आणि १० मे रोजी सुरू होणार आहे. या दोन दिवसांत समुपदेशन आणि बदलीचे आदेश एकाच वेळी दिले जातील. जिल्हा परिषदेतील एकूण कर्मचाऱ्यांपैकी साधारणतः १० टक्के कर्मचाऱ्यांच्या प्रशासकीय आणि तेवढ्याच कर्मचाऱ्यांच्या विनंतीनुसार बदल्या केल्या जातात. मुख्य कार्यकारी अधिकारी सत्यम गांधी यांच्या निर्देशानुसार सामान्य प्रशासन विभागाने या बदली प्रक्रियेची तयारी केली आहे. ही प्रक्रिया जिल्हा परिषदेच्या डॉ. पंजाबराव देशमुख सभागृहात सकाळी १० वाजल्यापासून सुरू होईल. यामध्ये प्रशासकीय, विनंती आणि आपसी (म्युच्युअल) बदल्यांचा समावेश आहे. ९ मे रोजी महिला व बाल विकास, पशुसंवर्धन, वित्त, कृषी आणि आरोग्य विभागातील (आरोग्य सेवक/सहाय्यक पुरुष) संवर्गासाठी बदली प्रक्रिया राबवली जाईल. तर, दुसऱ्या दिवशी म्हणजेच १० मे रोजी आरोग्य विभागातील उर्वरित सर्व संवर्गांच्या बदल्यांचे समुपदेशन केले जाईल. बदली प्रक्रियेत पारदर्शकता राखण्यासाठी शासनाच्या मार्गदर्शक सूचनांनुसार प्राधान्यक्रम ठरवण्यात आला आहे. या प्रक्रियेदरम्यान ‘पती-पत्नी एकत्रीकरण’ आणि ‘५३ वर्षे पूर्ण झालेल्या कर्मचाऱ्यांच्या विनंती’ या बाबींचा सहानुभूतीपूर्वक विचार केला जाईल. या निर्णयामुळे जिल्हा परिषदेच्या कामकाजात अधिक स्पष्टता आणि शिस्त येण्याची अपेक्षा आहे. बदली प्रक्रियेमध्ये काही विशिष्ट कर्मचाऱ्यांना प्राधान्य दिले जाणार आहे. यामध्ये गंभीर आजार (जसे की पक्षाघात, हृदय शस्त्रक्रिया, कॅन्सर, किडनी विकार), दिव्यांग कर्मचारी, मतिमंद मुलांचे पालक आणि स्वातंत्र्य सैनिकांचे वारस यांचा समावेश आहे. तसेच, आदिवासी भागातून गैर-आदिवासी भागात येणाऱ्या आणि तीन वर्षे सलग सेवा पूर्ण केलेल्या कर्मचाऱ्यांनाही प्राधान्यक्रमानुसार संधी दिली जाईल.
