धीरेंद्र शास्त्रींचा दावा- ऑक्सिजन बंद होऊनही मुलगा वाचला:नागपुरात ‘चमत्कारा’च्या दाव्यावरून नवा वाद

वादग्रस्त वक्तव्यांमुळे चर्चेत असलेले धीरेंद्र कृष्ण शास्त्री पुन्हा एकदा नव्या वादाच्या केंद्रस्थानी आले आहेत. नागपूरच्या रेशीमबाग मैदानावर सुरू असलेल्या रामकथा कार्यक्रमादरम्यान ‘दिव्य दरबार’मध्ये त्यांनी एका गंभीर आजाराने ग्रस्त बालकाचा जीव “चमत्काराने” वाचल्याचा दावा केला आहे. या दाव्यामुळे अंधश्रद्धा निर्मूलन समिती (ANIS) आक्रमक झाली असून, त्यांनी या प्रकाराचा तीव्र निषेध केला आहे. कार्यक्रमात बोलताना शास्त्री यांनी एका १२ वर्षीय मुलाचा उल्लेख केला. हा मुलगा जवळपास १०० दिवस व्हेंटिलेटरवर होता आणि त्याला दुर्मीळ व असाध्य आजार झाल्यामुळे डॉक्टरांनी आशा सोडली होती, असे त्यांनी सांगितले. एका टप्प्यावर काही मिनिटांसाठी मुलाचा ऑक्सिजन पुरवठा बंद झाला होता, अशी परिस्थिती निर्माण झाली होती, असेही शास्त्री म्हणाले. मात्र, “बागेश्वर बालाजीच्या कृपेने आणि भक्तीमुळे त्या मुलाला पुनर्जन्म मिळाला,” असा दावा धीरेंद्र कृष्ण शास्त्री यांनी केला. यावेळी संबंधित मुलाच्या पालकांनीही आपल्या मुलाचा जीव “चमत्कारामुळेच वाचला” असल्याचे सांगितले. “डॉक्टरांनी हात टेकले होते, पण देवाने साथ दिली,” असे भावनिक वक्तव्य त्यांनी केले. या दाव्यानंतर अंधश्रद्धा निर्मूलन समिती आक्रमक झाली आहे. समितीचे प्रमुख कार्यकर्ते शाम मानव यांनी या प्रकाराचा तीव्र निषेध करत म्हटले की, “वैद्यकीय उपचार सुरू असताना त्याचे श्रेय चमत्काराला देणे हे समाजाची दिशाभूल करणारे आहे.” त्यांनी या घटनेची सखोल चौकशी करण्याची मागणी केली असून, अशा प्रकारचे दावे अंधश्रद्धा निर्मूलन कायद्यांतर्गत गुन्हा ठरू शकतात, असेही स्पष्ट केले. वैद्यकीय क्षेत्रातील काही जाणकारांनीही या प्रकरणावर प्रश्नचिन्ह उपस्थित केले आहे. “ऑक्सिजन पुरवठा काही मिनिटे खंडित झाल्यास मेंदूवर गंभीर परिणाम होऊ शकतो. अशा परिस्थितीत केवळ ‘चमत्कार’ म्हणून याचे स्पष्टीकरण देणे वैज्ञानिकदृष्ट्या ग्राह्य नाही,” असे मत त्यांनी व्यक्त केले. दरम्यान, या संपूर्ण वादावर प्रतिक्रिया देताना धीरेंद्र कृष्ण शास्त्री यांनी हलक्याफुलक्या शैलीत, “आम्ही जेव्हा नागपुरात येतो, तेव्हा काही ना काही वाद होतोच,” असे म्हणत प्रकरणावर भाष्य केले.