नागपुरात डेटिंग ॲपवरून मैत्री पडली महागात:हॉटेलचे बिल आले 35000, तरुणीने काढला पळ; मॅनेजरविरुद्ध गुन्हा दाखल
डेटिंग ॲप्सचा वाढता वापर फसवणुकीच्या घटनांना निमंत्रण देत असल्याचे नागपूरमधील एका धक्कादायक घटनेवरून समोर आले आहे. शहरातील सदर पोलिस स्टेशन हद्दीत एका तरुणीने डेटिंग ॲपच्या माध्यमातून ओळख झालेल्या तरुणाला हॉटेलमध्ये नेऊन त्याची तब्बल 35000 रुपयांची फसवणूक केल्याचा प्रकार उघडकीस आला आहे. हॉटेलमध्ये जेवण केल्यानंतर आलेल्या इतक्या मोठ्या बिलामुळे चक्रावलेल्या तरुणाने आपली फसवणूक झाल्याचे लक्षात येताच थेट पोलिस ठाण्यात धाव घेतली असून, ऑनलाइन मैत्री आणि भेटीगाठींच्या नावाखाली तरुणांना आर्थिक गंडा घालणारी नवी पद्धत या निमित्ताने समोर आली आहे. पोलिसांनी दिलेल्या माहितीनुसार, या तरुणाची एका तरुणीशी डेटिंग ॲपद्वारे ओळख झाली आणि काही दिवस चॅटिंग केल्यानंतर तिने त्याला नागपूरच्या सदर भागातील एका हॉटेलमध्ये भेटायला बोलावले. भेटीदरम्यान तरुणीने महागडे खाद्यपदार्थ आणि मद्याची मोठी ऑर्डर दिली. हॉटेलचे बिल अवास्तव वाढत असल्याचा संशय आल्याने तरुणाने वेटरकडून बिल मागितले असता, त्याला तब्बल 35 हजार रुपयांचा आकडा पाहून धक्काच बसला. त्याने मेनू कार्डची पडताळणी केली असता, हॉटेलमध्ये शिरताना दाखवलेले दर आणि बिलासाठी वापरलेले दर यात मोठी तफावत असल्याचे आणि दोन वेगवेगळी मेनू कार्ड वापरली गेल्याचे उघड झाले. एवढ्या मोठ्या रकमेचे बिल भरण्यास तरुणाने नकार देताच हॉटेलचा मॅनेजर आणि बाउन्सरने त्याला घेराव घालून धमकावण्यास सुरुवात केली. हॉटेल कर्मचारी आणि तरुण यांच्यात सुरू असलेल्या या जोरदार वादावादीचा फायदा घेत, संबंधित तरुणी हॉटेलमधून गुपचूप पसार झाली. आपली पद्धतशीरपणे फसवणूक झाल्याचे लक्षात येताच या तरुणाने थेट पोलिस ठाणे गाठून आपबिती कथन केली. ऑनलाइन मैत्रीच्या आमिषाने हॉटेल आणि तरुणीच्या संगनमताने तरुणांना लुबाडण्याचे मोठे रॅकेट यात सक्रिय असण्याची शक्यता वर्तवण्यात येत आहे. आपली फसवणूक झाल्याचे लक्षात येताच संबंधित तरुणाने सदर पोलिस ठाण्यात रीतसर तक्रार दाखल केली असून, पोलिसांनी या तक्रारीवरून हॉटेल मालक आणि मॅनेजरविरुद्ध फसवणुकीचा गुन्हा नोंदवला आहे. या संपूर्ण प्रकरणाचा पुढील तपास सुरू असतानाच, त्या तरुणीची या गुन्ह्यात नेमकी काय भूमिका आहे आणि तिने अशाच प्रकारे अन्य कोणाची फसवणूक केली आहे का, यादृष्टीने पोलिस तिचा कसून शोध घेत आहेत.
वार्ताहार/प्रतिनिधी
