कृष्णा उमरीकर यांना राज्यस्तरीय जीवन गौरव पुरस्कार जाहीर;शिर्डी येथे ३ नोव्हेंबर रोजी पुरस्कार वितरण सोहळा

कार्यक्रमाला कॅबिनेट मंत्री आशीष दामले हे अध्यक्ष म्हणून उपस्थित राहणार असून, पं. अनंत शास्त्री भगरे गुरुजी यांचे शुभाशीर्वाद लाभणार आहेत.
कृष्णा उमरीकर हे नांदेड जिल्ह्यातील ज्येष्ठ पत्रकार असून, ते गेल्या ३० वर्षांहून अधिक काळ पत्रकारिता क्षेत्रात कार्यरत आहेत. त्यांनी दैनिक सत्यप्रभा, दैनिक श्रमिक एकजूट, दैनिक लोकपत्र, दैनिक देशोन्नती, दैनिक एकमत आणि दैनिक वृत्त केसरी या वृत्तपत्रांमध्ये संपादकीय विभागात विविध जबाबदाऱ्या सांभाळल्या आहेत. सध्या ते दैनिक पुण्य नगरी, नांदेड येथे पूर्णवेळ पत्रकार म्हणून कार्यरत आहेत. पत्रकारितेबरोबरच सामाजिक कार्यातही त्यांचे उल्लेखनीय योगदान आहे. त्यांनी आतापर्यंत ५० वेळा रक्तदान केले असून, नांदेड येथील डॉ. शंकरराव चव्हाण शासकीय रुग्णालयातर्फे रक्तदानासाठी त्यांचा सन्मान करण्यात आला आहे. विद्यार्थी आंदोलनात सक्रिय सहभाग घेत त्यांनी शैक्षणिक समस्यांसाठी संघर्ष केला. तसेच नांदेड आणि मराठवाड्यातील रेल्वे विस्तार व विकासाच्या आंदोलनातही त्यांनी अनेकदा सहभाग घेतला आहे.

अखिल भारतीय विद्यार्थी परिषदेत नांदेड शहर सहमंत्री, मंत्री आणि महाराष्ट्र प्रदेश सहमंत्री म्हणून त्यांनी काम केले आहे. सध्या ते विविध सामाजिक व पत्रकार संघटनांमध्ये पदाधिकारी म्हणून कार्यरत आहेत. त्यांच्या पत्रकारिता आणि सामाजिक कार्याची दखल घेत त्यांना कॉ. अनंतराव नागापूरकर स्मृती राज्य उत्कृष्ट पत्रकारिता पुरस्कार, तुफानातील दिवे पत्रकारिता पुरस्कार, सत्यशोधक पत्रकारिता पुरस्कार, फुले-आंबेडकरी विचारधारा राज्य पत्रकारिता पुरस्कार, कोरोना योद्धा पुरस्कार आणि डॉ. शंकरराव चव्हाण विकास पत्रकारिता पुरस्कार यांसह अनेक पुरस्कारांनी सन्मानित करण्यात आले आहे. कृष्णा उमरीकर यांना राज्यस्तरीय पुरस्कार जाहीर झाल्याने त्यांच्या पत्रकारिता आणि सामाजिक कार्याची दखल घेतली जात असल्याची भावना व्यक्त होत आहे. या पुरस्काराबद्दल त्यांचे सर्व स्तरांतून अभिनंदन केले जात आहे.