इगतपुरी तालुक्यात पूर्वसूचना न देता 19 हजार नागरिकांचे रेशनकार्ड रद्द:कार्ड पूर्ववत सुरू करण्यासाठी मनसेतर्फे उपाेषणाचा इशारा; तहसीलदारांना निवेदन

.

इगतपुरी तालुका आदिवासीबहुल असून, अनेक गरीब शेतकरी कुटुंबांच्या शिधापत्रिका बंद झाल्या आहेत. रेशन दुकानदारांकडून नागरिकांना याची माहिती मिळाल्यानंतर त्यांनी शिष्टमंडळासमवेत तहसीलदारांकडे व्यथा मांडल्या. बंद केलेल्या शिधापत्रिका पुन्हा सुरू कराव्यात, शासनाने यापुढे पूर्वसूचना द्यावी, जाचक अटी रद्द कराव्यात आणि सर्व कार्डधारकांचे सर्वेक्षण करून अन्याय दूर करावा, अशी मागणी निवेदनाद्वारे करण्यात आली.

तहसीलदार बारवकर यांनी दोन ते तीन दिवसांत आढावा बैठक घेऊन निवेदन शासनदरबारी सादर करण्याचे आश्वासन दिले. कोणावरही अन्याय होणार नाही, याची काळजी घेऊन शिधापत्रिका पुन्हा सुरू करण्यासाठी प्रयत्न करण्यात येतील, असेही त्यांनी सांगितले. शासनाने कुटुंबातील सदस्याकडे चारचाकी वाहन नसावे, आयकर विवरणपत्र भरणारा सदस्य नसावा आणि लाभार्थी अल्पभूधारक असावा, अशा अटी घातल्याने शिधापत्रिका रद्द झाल्याचे बोलले जात आहे. मात्र, याबाबतची माहिती घेऊन पुढील दोन दिवसांत निर्णय घेतला जाईल, असेही त्यांनी सांगितले. यावेळी मनसेचे विक्रम पासलकर, गणेश मुसळे, अंकुश जाधव, वैभव दातीर, संस्कार टिळे, काळू मते, राजाराम मते आदी पदाधिकाऱ्यांसह विविध गावांतील शिधापत्रिकाधारक शेतकरी मोठ्या संख्येने उपस्थित होते.

कारण : विविध निकषांमुळे शिधापत्रिका एनपीएचमध्ये प्राधान्य व अंत्योदय प्रकारातील ४३०० शिधापत्रिका शासनाने थेट एनपीएचमध्ये वर्ग केल्या आहेत. उत्पन्न जास्त असणे, तीन महिन्यांपेक्षा अधिक काळ धान्य न घेणे, ई-केवायसी न करणे, डुप्लिकेट शिधापत्रिका, मृत लाभार्थ्यांची नावे कमी न करणे आणि जास्त जमीन असणे, अशी विविध कारणे यामागे असल्याचे पुरवठा विभागाकडून सांगण्यात आले.

नव्या कार्डासाठी सहा महिने ^नव्याने शिधापत्रिका सुरू करण्यासाठी ६ महिन्यांचा अवधी लागू शकतो. ही कारवाई वरिष्ठ कार्यालयातून करण्यात आली आहे. अनेक नागरिक याविषयी विचारणा करण्यासाठी येत आहे. आम्ही शिधापत्रिकाधारकांना कार्ड कशामुळे बंद झाले याची कारणे सांगत आहोत. नागरिकांना संपूर्ण सहकार्य करण्यात येईल.- ललित पाटील, पुरवठा निरीक्षण अधिकारी, इगतपुरी