[ads1]
कोल्हापूर (प्रतिनिधी)- क्रीडा क्षेत्रातील प्रदीर्घ आणि अमूल्य योगदानाची दखल घेत द्रोणाचार्य व अर्जुन पुरस्कारप्राप्त ज्येष्ठ प्रशिक्षक धर्मेंद्र यादव यांची शांतीदूत राष्ट्ररत्न पुरस्कार २०२६ साठी निवड करण्यात आली आहे. समाज, राष्ट्र आणि विविध क्षेत्रांत उल्लेखनीय कार्य करणाऱ्या गुणवंत व्यक्तींचा गौरव करण्याच्या उद्देशाने शांतीदूत परिवारातर्फे हा विशेष सन्मान प्रदान केला जातो.
उत्कृष्ट मुष्टियोद्ध्यांची घडण आणि देशाचा गौरव
धर्मेंद्र यादव यांनी आपल्या प्रदीर्घ क्रीडा कारकिर्दीत केवळ स्वतःची एक भक्कम ओळख निर्माण केली नाही, तर देशासाठी विविध स्पर्धांमध्ये चमकणारे अनेक गुणवंत मुष्टियोद्धे घडवण्याचे अत्यंत मोलाचे कार्य केले आहे. त्यांच्या कुशल मार्गदर्शनाखाली तयार झालेल्या अनेक भारतीय खेळाडूंनी राष्ट्रीय तसेच आंतरराष्ट्रीय स्तरावर पदकांची कमाई करत देशाचा गौरव वाढवला आहे. खेळाडूंचे तांत्रिक कौशल्य उंचावण्यासोबतच त्यांच्यामध्ये शिस्त, आत्मविश्वास, मानसिक ताकद आणि देशासाठी सर्वोत्तम कामगिरी करण्याची जिद्द निर्माण करण्यात यादव यांची भूमिका अत्यंत महत्त्वपूर्ण ठरली आहे. भारतीय बॉक्सिंग क्षेत्रातील प्रतिभावान खेळाडूंना शोधून त्यांना योग्य प्रशिक्षण देणे, त्यांच्या खेळातील उणिवा दूर करणे आणि मोठ्या स्पर्धांसाठी त्यांची मानसिक व शारीरिक तयारी करून घेणे हे कार्य त्यांनी सातत्याने केले आहे.
मान्यवरांच्या उपस्थितीत भव्य गौरव सोहळा
शांतीदूत परिवाराचे सर्वेसर्वा आणि महाराष्ट्र राज्याचे सेवानिवृत्त विशेष पोलीस महानिरीक्षक IPS डॉ. विठ्ठलराव जाधव यांच्या शुभहस्ते धर्मेंद्र यादव यांना हा प्रतिष्ठित पुरस्कार प्रदान करण्यात येणार आहे.या प्रसंगी सौ. विद्या जाधव यांची उपस्थिती होती. या भव्य पुरस्कार सोहळ्यास क्रीडा, सामाजिक, शैक्षणिक व सांस्कृतिक क्षेत्रांतील अनेक मान्यवर उपस्थित राहणार आहेत. राष्ट्रीय स्तरावर भारतीय खेळाडूंना घडवून देशाचे नाव उज्ज्वल करणाऱ्या एका थोर प्रशिक्षकाच्या कार्याचा या सोहळ्याच्या निमित्ताने यथोचित सन्मान केला जाणार आहे.
Post Views: 26
[ads2]
Leave a Reply