सातारा जिल्हा बँक निवडणुकीत मोठी घडामोड:रामराजे नाईक-निंबाळकरांची माघार, कराडमध्ये उदयसिंह पाटील विरुद्ध बाळासाहेब पाटील यांच्याकडे लक्ष

सातारा जिल्हा मध्यवर्ती सहकारी बँकेच्या संचालक मंडळाच्या निवडणुकीत महत्त्वाच्या घडामोडींना वेग आला आहे. विधान परिषदेचे माजी सभापती आणि बँकेचे विद्यमान संचालक रामराजे नाईक-निंबाळकर यांनी फलटण तालुका सोसायटी आणि कृषी प्रक्रिया या दोन्ही मतदारसंघांतील आपले उमेदवारी अर्ज मागे घेतले आहेत. रिझर्व्ह बँक ऑफ इंडियाच्या (आरबीआय) निकषांनुसार सलग दहा वर्षांहून अधिक काळ संचालकपदावर राहिलेल्या नेत्यांच्या पात्रतेबाबत प्रश्न निर्माण होण्याची शक्यता असल्याने, भविष्यात अपात्रतेची नामुष्की टाळण्यासाठी रामराजेंनी निवडणुकीतून माघार घेतल्याची चर्चा आहे. त्यांच्या या निर्णयामुळे जिल्हा बँकेच्या निवडणुकीतील राजकीय समीकरणांमध्ये बदल होण्याची शक्यता व्यक्त केली जात आहे. जिल्हा बँकेच्या संचालक मंडळाच्या निवडणुकीसाठी सध्या उमेदवारी अर्ज मागे घेण्याची प्रक्रिया सुरू आहे. या पार्श्वभूमीवर रामराजे नाईक-निंबाळकर यांनी फलटण तालुका सोसायटी आणि कृषी प्रक्रिया या दोन्ही मतदारसंघांतील उमेदवारी अर्ज मागे घेतल्याने राजकीय वर्तुळात चर्चेला उधाण आले आहे. रामराजे हे जिल्ह्यातील सहकार क्षेत्रातील ज्येष्ठ नेते असून, जिल्हा बँकेच्या राजकारणात त्यांचे महत्त्वाचे स्थान राहिले आहे. त्यामुळे त्यांच्या माघारीचा परिणाम संबंधित मतदारसंघांतील निवडणुकीवर कसा होणार, याकडे सर्वांचे लक्ष लागले आहे. मात्र, रामराजेंनी माघार घेतली असली तरी फलटण तालुका सोसायटी आणि कृषी प्रक्रिया मतदारसंघांतील निवडणुकीचे चित्र अद्याप स्पष्ट झालेले नाही. या मतदारसंघांत अन्य उमेदवार रिंगणात असल्याने निवडणुकीतील चुरस कायम राहण्याची शक्यता आहे. उमेदवारी अर्ज मागे घेण्याच्या अंतिम मुदतीनंतरच कोणत्या मतदारसंघांत थेट लढती होणार आणि कुठे निवडणुकीचे वेगळे चित्र दिसणार, हे स्पष्ट होईल. कराडमध्ये उदयसिंह पाटील-उंडाळकर विरुद्ध बाळासाहेब पाटील? जिल्हा बँकेच्या निवडणुकीत सर्वाधिक लक्षवेधी ठरलेल्या कराड तालुका सोसायटी मतदारसंघातही राजकीय हालचालींना वेग आला आहे. जिल्हा बँकेच्या राजकारणावर दीर्घकाळ प्रभाव राहिलेल्या लोकनेते दिवंगत विलासकाका उंडाळकर यांचे सुपुत्र ॲड. उदयसिंह पाटील-उंडाळकर या मतदारसंघातून निवडणूक लढवत आहेत. मागील पराभवाचा वचपा काढण्याच्या तयारीने त्यांनी यंदा निवडणुकीच्या मैदानात उतरल्याचे चित्र आहे. उदयसिंह पाटील-उंडाळकर यांच्यासमोर माजी सहकार मंत्री बाळासाहेब पाटील यांचे आव्हान आहे. त्यामुळे कराड तालुका सोसायटी मतदारसंघातील लढत प्रतिष्ठेची ठरण्याची शक्यता आहे. बाळासाहेब पाटील आपला उमेदवारी अर्ज कायम ठेवणार की माघार घेऊन त्यांच्या जागी अन्य उमेदवाराला संधी दिली जाणार, याबाबत राजकीय वर्तुळात उत्सुकता आहे. या निर्णयावर कराडमधील निवडणुकीचे अंतिम स्वरूप अवलंबून राहणार आहे. दोन्ही बाजूंच्या समर्थकांकडून निवडणुकीच्या तयारीला वेग देण्यात येत असून, उमेदवारी अर्ज माघारीच्या अंतिम दिवसापर्यंत राजकीय घडामोडी सुरू राहण्याची शक्यता आहे. त्यामुळे कराडमध्ये थेट लढत होणार की समीकरणांमध्ये बदल होणार, याकडे जिल्ह्यातील सहकार क्षेत्राचे लक्ष लागले आहे. प्रचारासाठी अवघे दहा दिवस; ठरावधारक मतदारांच्या सहलींची चर्चा जिल्हा बँकेच्या निवडणुकीत उमेदवारी अर्ज मागे घेण्याची अंतिम मुदत बुधवारी आहे. त्यानंतर प्रचारासाठी अवघे दहा दिवस मिळणार असल्याने उमेदवारांनी मतदारांपर्यंत पोहोचण्यासाठी हालचाली सुरू केल्या आहेत. कराड तालुका सोसायटी मतदारसंघातील उमेदवार ॲड. उदयसिंह पाटील-उंडाळकर यांनी आपल्या बाजूच्या ठरावधारक मतदारांना कराडमध्ये बोलावून घेत सहलीवर पाठविल्याची माहिती समोर आली आहे. जिल्हा बँकेच्या निवडणुकीत सहकारी संस्थांचे ठरावधारक मतदार निर्णायक भूमिका बजावतात. त्यामुळे या मतदारांशी संपर्क साधणे, त्यांची मते आपल्या बाजूने वळवणे आणि मतदानापर्यंत त्यांच्याशी समन्वय राखणे, यासाठी उमेदवारांकडून प्रयत्न केले जात आहेत. आगामी दहा दिवसांत जिल्ह्यातील विविध तालुक्यांमधील ठरावधारक मतदारांच्या सहली आणि उमेदवारांच्या भेटीगाठींना वेग येण्याची शक्यता आहे. कराड, पाटण, फलटण आणि जावळीत चुरशीच्या लढती सातारा जिल्हा मध्यवर्ती सहकारी बँकेच्या निवडणुकीत कराड, पाटण, फलटण आणि जावळी तालुका सोसायटी मतदारसंघांतील लढतींकडे विशेष लक्ष लागले आहे. या मतदारसंघांत उमेदवारांची प्रतिष्ठा पणाला लागली असून, स्थानिक राजकीय समीकरणे आणि सहकार क्षेत्रातील प्रभाव यांचा निकालावर परिणाम होण्याची शक्यता आहे. रामराजे नाईक-निंबाळकर यांच्या माघारीनंतर फलटणमधील राजकीय हालचालींना वेग येण्याची शक्यता आहे, तर कराडमध्ये उदयसिंह पाटील-उंडाळकर आणि बाळासाहेब पाटील यांच्या उमेदवारीबाबतच्या निर्णयाकडे सर्वांचे लक्ष आहे. पाटण आणि जावळीतील लढतीही चुरशीच्या ठरण्याची शक्यता असल्याने जिल्हा बँकेच्या निवडणुकीत अखेरच्या टप्प्यात कोणती समीकरणे जुळतात, हे महत्त्वाचे ठरणार आहे. उमेदवारी अर्ज माघारीची प्रक्रिया पूर्ण झाल्यानंतर निवडणुकीतील लढतींचे अंतिम चित्र स्पष्ट होईल. त्यानंतर प्रचारासाठी मिळणाऱ्या मर्यादित कालावधीत उमेदवारांकडून मतदारांशी संपर्क वाढवण्यावर भर दिला जाईल. त्यामुळे सातारा जिल्हा बँकेच्या निवडणुकीत आगामी काही दिवसांत आणखी राजकीय घडामोडी घडण्याची शक्यता आहे. हेही वाचा… ‘10 हजार मते बाद होत असतील, तर पदवी कोणी दिली’:मुख्यमंत्री देवेंद्र फडणवीसांची शिक्षक-पदवीधर मतदारांवर मिश्किल टोलेबाजी राज्यातील विधानपरिषदेच्या शिक्षक आणि पदवीधर मतदारसंघांच्या निवडणुकांच्या पार्श्वभूमीवर राजकीय प्रचाराला वेग आला आहे. महायुतीच्या उमेदवारांच्या प्रचारासाठी मुख्यमंत्री देवेंद्र फडणवीस यांनी सांगली येथे सभा घेतली. या सभेत त्यांनी शिक्षकांचे प्रश्न, राज्यातील औद्योगिक विकास, परकीय गुंतवणूक, रोजगारनिर्मिती आणि दुष्काळी परिस्थितीत शेतकऱ्यांना दिल्या जाणाऱ्या मदतीवर भाष्य केले. यावेळी मतपत्रिकेवरील बाद होणाऱ्या मतांचा संदर्भ देत त्यांनी शिक्षक आणि पदवीधर मतदारांवर मिश्किल टिप्पणी केली. सविस्तर वाचा…