अमरावती जिल्ह्यातील यावली शहीद-अडगाव मार्गावर भीषण अपघात झाला. पायी जात असलेल्या 5 मजुरांना मागून आलेल्या हायड्रा क्रेनने जोरदार धडक दिली. या दुर्घटनेत 3 मजुरांचा घटनास्थळीच मृत्यू झाला, तर अन्य 2 मजूर गंभीर जखमी झाले आहेत. जखमींना उपचारासाठी अमरावती येथील जिल्हा सामान्य रुग्णालयात दाखल करण्यात आले असून, या घटनेमुळे परिसरात हळहळ व्यक्त केली जात आहे. मागून आलेल्या हायड्रा क्रेनची मजुरांना जोरदार धडक मिळालेल्या माहितीनुसार, मध्य प्रदेशातील बक्की चिखली येथील 5 मजूर यावली शहीद-अडगाव मार्गावरून पायी जात होते. हे सर्व मजूर अडगावच्या दिशेकडून यावली शहीदकडे जात असताना मागून आलेल्या हायड्रा क्रेनने त्यांना धडक दिली. धडक जोरदार असल्याने पाचही मजूर अपघाताच्या विळख्यात सापडले. या अपघातात तिघांना गंभीर मार लागल्याने त्यांचा घटनास्थळीच मृत्यू झाला. तर अन्य दोघे जखमी झाले. अपघाताची तीव्रता लक्षात घेता परिसरातील नागरिकांनी घटनास्थळी धाव घेतली. घटनेची माहिती मिळताच पोलीस आणि प्रशासनाचे पथकही घटनास्थळी दाखल झाले. मृतांमध्ये राजेश बायस्कर, दिनेश आणि मदारी यांचा समावेश या दुर्घटनेत मृत्यू झालेल्या मजुरांची नावे राजेश बायस्कर, दिनेश आणि मदारी अशी असल्याची माहिती समोर आली आहे. तर पिंटू चव्हाण आणि राजू पानसे हे दोघे जखमी झाले आहेत. मृत्यू झालेले तिन्ही मजूर आणि जखमी झालेले दोघेही मध्य प्रदेशातील बक्की चिखली येथील रहिवासी असल्याचे सांगण्यात येत आहे. अपघातानंतर जखमींना तातडीने अमरावती येथील जिल्हा सामान्य रुग्णालयात उपचारासाठी हलवण्यात आले. त्यांच्यावर उपचार सुरू असून, त्यांची प्रकृती गंभीर असल्याची प्राथमिक माहिती आहे. दरम्यान, मृत मजुरांच्या कुटुंबीयांशी संपर्क साधण्याचे काम पोलिसांकडून सुरू आहे. माहुली जहागीर पोलीस ठाण्याच्या हद्दीत अपघात यावली शहीद-अडगाव मार्गावरील हा अपघात माहुली जहागीर पोलीस ठाण्याच्या हद्दीत घडला. घटनेची माहिती मिळाल्यानंतर पोलिसांनी घटनास्थळी पोहोचून पंचनामा करण्याची प्रक्रिया सुरू केली. अपघात नेमका कसा घडला, हायड्रा क्रेनच्या चालकाची भूमिका काय होती आणि इतर कोणत्या कारणांमुळे ही दुर्घटना घडली, याचा तपास केला जात आहे. या अपघातात तीन मजुरांचा मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. कामासाठी किंवा अन्य कारणाने प्रवास करणाऱ्या मजुरांच्या सुरक्षिततेचा प्रश्नही या घटनेमुळे ऐरणीवर आला आहे. पोलिसांच्या पुढील तपासानंतर अपघाताबाबत अधिक माहिती स्पष्ट होणार आहे. हेही वाचा…
‘अशी राजवट गाडलीच पाहिजे’:देशाची वाट लागताना गप्प बसणार असू, तर जगण्याचा अधिकार काय? उद्धव ठाकरेंची टीका निवडणुकीच्या माध्यमातून मत व्यक्त करण्याचा आणि आंदोलन करण्याचा अधिकार हिरावून घेतला जात असेल, तर सत्ताधाऱ्यांविरोधात उभे राहून सत्ता उलथवणे हाच आमचा निर्धार आहे, अशा शब्दांत शिवसेना पक्षप्रमुख उद्धव ठाकरे यांनी केंद्र सरकारवर जोरदार टीका केली. ‘आम्ही रेझिम चेंज करायलाच उभे आहोत, काय म्हणणं आहे तुमचं?’ असा सवाल करत त्यांनी संरक्षणमंत्री राजनाथ सिंह यांच्यासह पंतप्रधान नरेंद्र मोदी यांना लक्ष्य केले. अखिल भारतीय मराठी पत्रकार परिषदेच्या पुरस्कार वितरण सोहळ्यात ते बोलत होते. प्रशांत भूषण यांच्या सत्ताबदलासंदर्भातील वक्तव्यावरून भाजपकडून करण्यात आलेल्या आरोपांच्या पार्श्वभूमीवर ठाकरे यांनी आपली भूमिका मांडली. सविस्तर वाचा…