मोर्शी तालुक्यातील नेरपिंगळाईजवळच्या सुंदरगिरी पर्वतावर असलेल्या पिंगळादेवी मंदिराने एक महत्त्वाचा निर्णय घेतला आहे. यावर्षी नवरात्रोत्सवात जमा होणारी देणगी मुख्यमंत्री सहायता निधीला दिली जाणार आहे. राज्यात दुष्काळसदृश परिस्थिती असल्याने मंदिर व्यवस्थापनाने हा निर्णय घेतला आहे. या देणगीमुळे अभावग्रस्त शेतकऱ्यांना मदत होणार आहे. विदर्भात प्रसिद्ध असलेल्या या मंदिरात दरवर्षी नवरात्र उत्सव साजरा होतो आणि मोठ्या प्रमाणात दान जमा होते. पिंगळादेवी मंदिर ऐतिहासिक आणि जागृत देवस्थान म्हणून ओळखले जाते. अमरावती-मोर्शी मार्गावर अमरावतीपासून सुमारे ३५ किलोमीटर अंतरावर हे मंदिर आहे. हे मंदिर ८०० वर्षांहून अधिक जुने असून, हेमाडपंथी स्थापत्यशैलीत बांधले आहे.