पाश्चात्य संस्कृतीच्या व्हॅलेंटाईन डे साजरा करण्याला फाटा देत मेथा (ता. औंढानागनाथ) येथील गजानन नवयुवक मंडळाने शनिवारी ता. १४ रोटी डे साजरा केला. यावेळी हिंगोलीच्या सेवा सदनातील मुलांसह गरजूंना भोजनाचा डब्बा देत हा दिवस साजरा केला आहे. मागील पाच वर्षापासून त्यांचा हा उपक्रम सुरु आहे. देशभरात ता. १४ फेब्रुवारी रोजी व्हॅलेंटाईन डे साजरा केला जातो. मात्र मेथा येथील तरुण गजानन लोंढे यांनी रोटी डे साजरा करण्याची संकल्पना पाच वर्षापुर्वी मांडली होती. त्यानुसार गावातील तरुणांनी या उपक्रमाला उत्स्फूर्त प्रतिसाद दिला. त्यानुसार यावर्षीही अस्मिता फाऊंडेशन व गजानन नवयुवक मंडळाच्या तरुणांनी सकाळ पासूनच रोटी डे ची तयारी सुरु केली होती. त्यासाठी सदस्यांनी हिंगोली शहरातील तसेच लगतच्या झोपड्यांमध्ये तसेच पालावर राहणाऱ्या १५०० कुटुंबांना भोजनाचा डब्बा दिला. या शिवाय हिंगोली येथील सेवासदन वसतीगृह, अंध विद्यालय तसेच शासकिय रुग्णालयातील रुग्ण व त्यांच्या नातेवाईकांना भोजनाचा डब्बा देण्यात आला. हिंगोलीत सकाळी ठीक दहा वाजता खटकाळी हनुमान मंदिर परिसर, त्यानंतर दुपारी दोन वाजता सेवासदन वसतिगृह, सायंकाळी सहा वाजता शासकीय रुग्णालय हिंगोली, अंध विद्यालयात विद्यार्थ्यांना डब्बा देण्यात आला. यामध्ये संपूर्ण भोजनाचा समावेश होता. यावेळी गजानन नवयुवक मंडळाच्या या अभिनव उपक्रमाचे सेवासदन वस्तीग्रहाच्या संचालिका मीराताई धनराज कदम यांच्या वतीने कौतुक करण्यात आले. या कार्यक्रमाला यशस्वी करण्यासाठी गावातील सौरभ लोंढे, मंगेश आनेकर, कृष्णा लोंढे, मुरली लोंढे, गंगाधर लोंढे, कुंडलिक लोंढे मानकरी, पांडुरंग शिंदे, केशव घेणेकर, ओमकार लोंढे, शिवहर महाराज, ऋषी लोंढे, अशोक कुबडे,मुकुंद शिंदे यांनी पुढाकार घेतला. एक दिवस तरी भोजन दिल्याचा आनंद- गंगाधर लोंढे पाश्चात्य संस्कृतीला बाजूला ठेवून मराठी अस्मिता जपणारा उपक्रम आम्ही गजानन नवयुवक मंडळाच्या वतीने राबवत आहोत. या उपक्रमामुळे किमान एक दिवस तरी भुकेल्यांना पोटभर जेवण मिळेल याचा आनंद आहे.
मेथा येथील गजानन नवयुवक मंडळाने साजरा केला 'रोटी डे':सेवासदनासह 1500 गरजूंना दिला भोजनाचा डब्बा, पाच वर्षापासून उपक्रम
