भाजप आमदार संजय केणेकर यांच्या क्रांती चौकातील कार्यालयात सापडलेल्या एका बॅगमध्ये शनिवारी सकाळी एक एअरगन आढळली आहे. क्रांती चौक पोलिसांनी तातडीने कार्यालयात जाऊन तपासणी केली. या प्रकरणी रितेश संतोष होळकर (२३, रा. सातारा परिसर) यास ताब्यात घेण्यात आले, असे निरीक्षक सुनील माने यांनी दिली. आरोपीची कुठलीही गुन्हेगारी तसेच राजकीय पार्श्वभूमी नाही. पण त्याने आ. केणेकरांच्या कार्यालयात ही गन का आणली, याची चौकशी सुरू आहे. केणेकर यांनी क्रांती चौक भागातील कार्यालयात शुक्रवारी संध्याकाळी अनेक कार्यकर्ते, पदाधिकारी व सामान्य लोकांच्या भेटी घेतल्या. रात्री घरी गेल्यावर त्यांच्या कार्यालयात एक बॅग तशीच राहिली असल्याचे कर्मचाऱ्यांच्या लक्षात आले. ती बाजूला ठेवली. मात्र सकाळपर्यंत कुणीही बॅगविषयी विचारणा केली नसल्याने कर्मचाऱ्यांनी बॅगेची तपासणी केली असता बॅगेत कव्हरमध्ये पिस्तुल सदृश्य वस्तू दिसली. ही बाब केणेकरांना कळताच त्यांनी पोलिसांशी संपर्क साधला. पोलिसांनी धाव घेऊन तपासणी केली असता ही पिस्तूल नसून एअरगन असल्याचे स्पष्ट झाले. कार्यालयातील सीसीटीव्ही फुटेजवरून क्रांती चौक पोलिसांनी आरोपीला ताब्यात घेत त्याच्यावर गुन्हा दाखल केला. मला अनेकदा धमक्या येतात मला मनपा निवडणुकीत अनेक धमक्या आल्या. त्यामुळे माझ्या जिवाला धोका दिसतो. कुणीतरी त्याच दृष्टीने हा प्रकार केला आहे. याचा सखोल तपास होणे आवश्यक आहे, असे आमदार संजय केणेकर यांनी म्हटले. ती बंदूक त्यांचीच, तपास व्हावा बंदूक सापडली नसून ती बॅगेत होती. ही बंदूक त्यांचीच असू शकते, त्याचाही तपास होणे गरजेचे आहे. त्यांच्याच पक्षात त्यांची कुणाशी दुश्मनी आहे, त्यासाठी त्यांनीच ठेवली होती का, असा सर्व बाजूंनी तपास होणे गरजेचे आहे, असे उद्धवसेनेचे नेते अंबादास दानवे यांनी म्हटले. मनपात नोकरीची मागणी करण्यासाठी कार्यालयात आरोपी रितेश होळकर हा उच्चशिक्षित तरुण आहे. तो सध्या नोकरीच्या शोधात होता. मनपामध्ये २२२ पदांसाठी भरती प्रक्रिया होणार होती. त्यासाठी आपली वर्णी लागावी या आशेने तो केणेकर यांना भेटण्यासाठी कार्यालयात भेट घेण्यासाठी गेला होता. मात्र त्याच वेळी त्याच्याकडे असलेली बॅग तो त्याच ठिकाणी विसरून आला आणि या गुन्ह्यात अडकला.
आ. केणेकरांच्या कार्यालयात सापडलेल्या बॅगेत एअरगन:आरोपी अटकेत; केणेकर म्हणाले, माझ्या जिवाला धोका
