वॉटर फिल्टर प्लांटमधील पाण्याचा पुनर्वापर करा;जिल्हाधिकारी राहुल कर्डिले यांचे वॉटर प्लांट चालकांना आवाहन

• प्लांटचे सर्वेक्षण करून माहिती सादर करण्याचे निर्देश

नांदेड (जिमाका)- अल्-निनोचा संभाव्य प्रभाव आणि दुष्काळसदृश परिस्थितीच्या पार्श्वभूमीवर पाण्याचा अपव्यय टाळून उपलब्ध जलस्रोतांचे संवर्धन करणे आवश्यक आहे. यासाठी वॉटर फिल्टर प्लांटमधून प्रक्रियेदरम्यान वाया जाणाऱ्या पाण्याचा पुनर्वापर करावा, तसेच हे पाणी जमिनीत मुरविण्यासाठी आणि गरजू नागरिकांच्या दैनंदिन वापरासाठी उपलब्ध करून देण्यासाठी आवश्यक उपाययोजना कराव्यात, असे आवाहन जिल्हाधिकारी राहुल कर्डिले यांनी केले आहे.

जिल्हाधिकाऱ्यांच्या अध्यक्षतेखाली 8 ऑक्टोबर रोजी जिल्ह्यातील पॅकेज्ड पिण्याच्या पाण्याचे उत्पादन व विक्री करणाऱ्या वॉटर असोसिएशनच्या सदस्यांची बैठक झाली. या बैठकीत पाण्याचा अपव्यय रोखणे आणि त्याच्या पुनर्वापराच्या उपाययोजनांवर चर्चा करण्यात आली. जिल्ह्यात एक लिटर पॅकेज्ड पाण्याचे उत्पादन करणाऱ्या युनिटची संख्या मर्यादित असून, त्यामध्ये वाया जाणाऱ्या पाण्याचे प्रमाणही कमी आहे. मात्र, 20 लिटरच्या फिल्टर पाण्याच्या जारची विक्री करणारे सुमारे 350 ते 400 युनिट जिल्ह्यात कार्यरत असल्याची माहिती बैठकीत देण्यात आली. या प्रक्रियेदरम्यान मोठ्या प्रमाणात पाणी वाया जात असल्याचे निदर्शनास आले आहे. या पार्श्वभूमीवर नांदेड शहर आणि शहरालगतच्या परिसरातील सर्व परवानाधारक तसेच विनापरवानाधारक वॉटर फिल्टर प्लांटचे सर्वेक्षण करून त्यांची माहिती सादर करण्याचे निर्देश जिल्हाधिकाऱ्यांनी संबंधितांना दिले.

पाण्याच्या पुनर्वापरासाठी उपाययोजना करा

शोषखड्ड्यांद्वारे भूजल पुनर्भरण : वॉटर फिल्टर प्लांटमधून प्रक्रियेदरम्यान बाहेर पडणारे पाणी शोषखड्डे तयार करून जमिनीत मुरवावे. यामुळे भूजल पुनर्भरणास मदत होईल. वाया जाणाऱ्या पाण्याचा पुनर्वापर : प्रक्रियेदरम्यान वाया जाणाऱ्या पाण्याचा इतर योग्य कामांसाठी जास्तीत जास्त पुनर्वापर करण्याच्या दृष्टीने नियोजन करावे. टंचाईच्या काळात दैनंदिन वापरासाठी पाणी उपलब्ध करून द्यावे : वाया जाणारे पाणी मोठ्या टाकीत साठवून ठेवावे. पाण्याच्या गुणवत्तेनुसार आणि योग्य वापरासाठी आवश्यक खबरदारी घेऊन हे पाणी परिसरातील गरजू नागरिकांना कपडे धुणे, भांडी घासणे, स्वच्छता आदी कामांसाठी उपलब्ध करून द्यावे. यामुळे पाणीटंचाईच्या काळात नागरिकांना काही प्रमाणात दिलासा मिळू शकतो.

पाणी बचतीसाठी सामाजिक जबाबदारी पार पाडा

आगामी काळातील संभाव्य पाणीटंचाई लक्षात घेता पाण्याचा प्रत्येक थेंब महत्त्वाचा आहे. उपलब्ध पाण्याचा काटकसरीने वापर करणे, प्रक्रियेदरम्यान होणारा अपव्यय रोखणे आणि वाया जाणाऱ्या पाण्याचा पुनर्वापर करणे ही काळाची गरज आहे. त्यामुळे जिल्ह्यातील सर्व परवानाधारक व विनापरवानाधारक वॉटर प्लांट चालक तसेच विक्रेत्यांनी सामाजिक जबाबदारीचे भान ठेवून पाणी बचतीसाठी तातडीने आवश्यक उपाययोजना कराव्यात, असे आवाहन जिल्हाधिकारी राहुल कर्डिले यांनी केले आहे.