छत्री तलाव परिसरात 'वेक्स'तर्फे स्वच्छता अभियान:जागतिक पाणथळ दिनानिमित्त 50 पोती कचरा गोळा

अमरावती येथील वाईल्डलाईफ अँड एन्व्हायरन्मेंट कन्झर्व्हेटर सोसायटी (वेक्स) ने जागतिक पाणथळ दिनानिमित्त छत्री तलाव परिसरात स्वच्छता अभियान राबवले. या अभियानांतर्गत सुमारे ५० पोती कचरा गोळा करून त्याची योग्य विल्हेवाट लावण्यात आली. पशू, पक्षी, प्राणी आणि पर्यावरणाच्या संवर्धनासाठी ‘वेक्स’ नेहमीच पुढाकार घेते. या उपक्रमात महाराष्ट्र पक्षिमित्र संघटनाही सहभागी झाली होती. दोन्ही संघटनांच्या संयुक्त विद्यमाने दरवर्षी असे अभियान राबवले जातात. यावर्षी ‘तलाव स्वच्छता व पक्षी निरीक्षण’ असे या कार्यक्रमाला नाव देण्यात आले होते. ब्रिजलाल बियाणी विज्ञान महाविद्यालयाचे ४८ विद्यार्थी आणि अनेक निसर्गप्रेमी नागरिक या अभियानात सहभागी झाले होते. सकाळी ७ ते ९.४० या वेळेत हा उपक्रम राबवण्यात आला. यावेळी मार्गदर्शक म्हणून ॲड. राजमेहेर निशाणे, पक्षी अभ्यासक प्रशांत निकम, आनंद मोहोड आणि ‘वेक्स’चे सचिव डॉ. जयंत वडतकर यांनी पक्षी निरीक्षण आणि छत्री तलावाच्या महत्त्वाबाबत उपस्थितांना मार्गदर्शन केले. ब्रिजलाल बियाणी विज्ञान महाविद्यालयातील प्राणिशास्त्र विभाग प्रमुख डॉ. किरण सांगवे, प्रा. डॉ. श्यामला कटके, प्रा. डॉ. रिना लहरिया आणि आश्विन खडसे यांचीही यावेळी उपस्थिती होती. सर्वप्रथम विद्यार्थ्यांनी या ऐतिहासिक तलावावरील पक्षी विविधतेची माहिती घेतली आणि तज्ज्ञ मार्गदर्शकांच्या मदतीने पक्षी निरीक्षणात सहभाग नोंदवला. त्यानंतर सर्व सहभागी निसर्गप्रेमी नागरिक आणि विद्यार्थ्यांनी श्रमदान केले. यावेळी तलावाच्या परिसरातून प्लास्टिक कचरा, मूर्तींचे अवशेष, काच आणि फोटो फ्रेम्स असा सुमारे ५० पोती कचरा गोळा करून त्याची योग्य विल्हेवाट लावण्यात आली. हा तलाव वाचवण्यासाठी सर्वांनी प्रयत्न करावेत, असे आवाहनही यावेळी करण्यात आले. ‘वेक्स’चे सचिव डॉ. जयंत वडतकर यांनी छत्री तलावाच्या सद्यस्थितीवर चिंता व्यक्त केली. एकेकाळी अमरावतीकरांची तहान भागवणारा हा तलाव आता प्रदूषित होत आहे. दैनंदिन कचरा, प्लास्टिकचा वापर आणि जलपर्णीच्या विळख्यामुळे त्याचे मूळ गुणधर्म आणि वैशिष्ट्ये नष्ट झाली आहेत. यामुळे दरवर्षी या तलावावर येणाऱ्या स्थलांतरित पक्ष्यांची संख्या घटत असून, त्यांचा अधिवासही हळूहळू नष्ट होत असल्याचे त्यांनी सांगितले.