पुणे येथे आयोजित चौथ्या मधु-स्मृती संगीत समारोहात डॉ. चेतना पाठक आणि पद्मश्री पंडित मधुप मुद्गल यांच्या भावपूर्ण गायनाने रसिकांना मंत्रमुग्ध केले. मधुकर खांडवे आणि मधुकर हस्तक यांच्या स्मृतीप्रित्यर्थ न्यू इंग्लिश हायस्कूलच्या गणेश सभागृहात हा समारंभ पार पडला. संगीत शिक्षणाला समर्पित ग्वाल्हेर घराण्याच्या गायिका डॉ. विद्या खांडवे आणि आजच्या तरुण पिढीचे आघाडीचे गायक कलाकार आदित्य खांडवे यांच्या संकल्पनेतून या समारोहाचे आयोजन करण्यात आले होते. ज्येष्ठ गायक पंडित सुहास व्यास यांच्या हस्ते समारोहाचे उद्घाटन झाले. किराणा घराण्याची गायकी आत्मसात केलेल्या डॉ. चेतना पाठक यांनी आपल्या सादरीकरणाची सुरुवात राग अपूर्वकल्याणमधील ‘साई सबन के बनवारे’ या बंदिशीने केली. त्यानंतर द्रुत लयीत ‘ऐसी लगन तुम्ही सो लागी’ ही रचना सादर केली. स्वरांची लयबद्ध आणि भावपूर्ण मांडणी करत त्यांनी राग दुर्गामधील द्रुत खयालातील ‘माता भवानी काली दुर्गा गौरी’ ही रचना तेजस्वीपणे सादर केली. डॉ. पाठक यांनी ‘तान तदानी दानी तदानी’ हा तराणा सादर करून मिश्र पहाडीमधील ‘तुम बिन साजन बरसत नैना’ या रचनेने आपल्या गायनाची सांगता केली. पंडित मधुप मुद्गल यांच्या मैफलीने कार्यक्रमाची रंगत अधिक वाढली. त्यांनी स्वरांचे सखोल चिंतन आणि कमालीच्या संवेदनशीलतेतून गायन सादर केले. पंडित मुद्गल यांनी गायनाची सुरुवात छायानट रागातील ‘नेवरकी झनकार’ या विलंबित खयालाने केली. याला जोडून ‘झनन झनन’ आणि ‘नही आना’ हे दोन छोटा खयाल प्रभावीपणे सादर केले. राग जोग सादर करताना त्यांनी ‘पिहरवा कोबेर मायो’ ही रचना सादर करून ‘दे रे न तदानो’ हा तराना ऐकविला. ‘डार डार पात पात बुलाये’ ही काफी कानडीतील रचना ऐकविताना पंडित मुद्गल यांनी शब्दांचा भाव जपत रागाचे स्वरूप साकारले. याला जोडून ‘तनन तेरे ना तना दे रे ना दिम’ हा तराणा तसेच हिंडोल हा प्रकार ऐकविताना ‘आयी बसंत रितु’ हा इंदोर घराणातील खयाल बहारदारपणे सादर करत त्याला जोडून ‘ताना दिड ताना नोम’ हा तराणा सादर केला. भक्तीसंगीतावर विशेष प्रभुत्व असणाऱ्या पंडित मुद्गल यांनी मैफलीची सांगता संत कबीर यांच्या ‘आवे न जावे मरे नही जन मे’ या भक्तीरचनेने केली. त्यांनी तालाचे वैविध्य दाखवताना हिंडोल रागातील सुरफाक्तासारख्या तालातील बंदिश सादर करून रसिकांची दाद मिळविली. त्यांच्या भावस्पर्शी सादरीकरणामुळे रसिक मंत्रमुग्ध झाले.
डॉ. चेतना पाठक, पंडित मधुप मुद्गल यांचे भावपूर्ण गायन:मधु-स्मृती संगीत समारोहात रसिकांना मंत्रमुग्ध केले
