CTET परीक्षा केंद्रात दागिन्यांवर बंदी:महिला उमेदवारांना मंगळसूत्रही काढायला लावले; ठाकरे गटाने VIDEO पोस्ट करत साधला निशाणा

सीटीईटी परीक्षा देण्यासाठी आलेल्या महिला परीक्षार्थींवर अंगावरील दागिनेच नव्हे तर गळ्यातील सौभाग्याचे लक्षण असणारे मंगळसूत्रही परीक्षा केंद्राबाहेर काढून ठेवण्याची वेळ आली आहे. प्रशासनाच्या या सूचनेमुळे या परीक्षार्थींची मोठी गैरसोय झाली. शिवसेना उद्धव बाळासाहेब ठाकरे पक्षाचे आमदार अंबादास दानवे यांनी या प्रकरणी सरकारवर शरसंधान साधत सीटीईटी परीक्षा हिंदुस्तानात झाली की पाकिस्तानात? असा तिखट सवाल केला आहे. आज राज्यासह देशभरात केंद्रीय शिक्षक पात्रता परीक्षा (सीटीईटी) सुरू आहे. पण छत्रपती संभाजीनगर येथील महिला उमेदवारांना या परीक्षेपूर्वी एक वेगळीच परीक्षा द्यावी लागली. या महिला उमेदवारांना परीक्षा केंद्राच्या आत जाण्यापूर्वी चक्क आपल्या गळ्यातील मंगळसूत्र काढून बाहेरच ठेवावे लागले. ही परीक्षा सकाळी साडे 9 ते दुपारी 12.30 पर्यंत होती. यासाठी सकाळी 7 वा. उमेदवारांना परीक्षा केंद्रावर हजर व्हायचे होते. यावेळी प्रशासनाने सर्वच उमेदवारांना अंगावरील दागदागिन्यांसह कोणत्याही प्रकारचे मेटल परीक्षा केंद्रात घेऊन जाण्यास मज्जाव केला. यात गळ्यातील मंगळसूत्राचाही समावेश होता. महिला उमेदवारांची झाली पंचाईत प्रशासनाने ऐनवेळी गळ्यातील मंगळसूत्रही काढून ठेवण्याची सूचना केल्यामुळे महिला उमेदवारांची चांगलीच पंचाईत झाली. ज्यांच्यासोबत कुटुंबातील एखादा सदस्य आला होता, त्यांच्यापुढे कोणताही प्रश्न नव्हता. पण ज्यांच्यासोबत कुणीही नव्हते, त्या महिला उमेदवारांची यामुळे चांगलीच पंचाईत झाली. सुरक्षेच्या नावाखाली होणारी ही अडवणूक अत्यंत चुकीची आहे. मंगळसूत्र हे सौभाग्याचे लेणे आहे. ते गळ्यातून कसे काढायचे? ते कुणाकडे ठेवायचे? अशी संतप्त भावना यावेळी या उमेदवारांनी व्यक्त केली. यामुळे परीक्षा केंद्रावर काहीवेळ गोंधळाचे वातावरण निर्माण झाले होते. मंगळसूत्र हा दिखाव्याचा दागिना नाही ठाकरे गटाचे आमदार तथा विधान परिषदेतील माजी विरोधी पक्षनेते अंबादास दानवे यांनीही या प्रकरणी आपला संताप व्यक्त केला. सीटीईटी परीक्षेसाठी महिलांच्या गळ्यातील मंगळसूत्रही काढण्याची सूचना करण्यात आली. मंगळसूत्र हा दिखाव्याचा दागिना नाही तर तो सौभाग्याचा दागिना आहे. परीक्षा केंद्रावर अशी सक्ती केली जात असेल, तर खूप गंभीर बाब आहे, असे ते म्हणाले. ही आपली संस्कृती की सरकारी दडपशाही? अंबादास दानवे यांनी या घटनेचा एक व्हिडिओही पोस्ट केला आहे. त्यात त्यांनी परीक्षा हिंदुस्तानात आहे की, पाकिस्तानात? असा प्रश्न केला आहे. विचित्र विरोधाभास! ‘हिंदुत्व’ आणि ‘संस्कृती’च्या गप्पा मारणाऱ्यांच्या राज्यात महिलांना मंगळसूत्र काढून परीक्षेला बसावं लागतंय. 11 वर्षांच्या सत्तेनंतरही प्रशासनाला ‘मंगळसूत्र’ आणि ‘कॉपी’ मधला फरक कळत नाही बहुदा. ही आपली संस्कृती की सरकारी दडपशाही? ही परीक्षा हिंदुस्थानात सुरु आहे, पाकिस्तानात नाही, असे त्यांनी भाजप व सरकारवर निशाणा साधताना म्हटले आहे.