मराठी आणि हिंदी चित्रपटसृष्टी गाजवणारे ज्येष्ठ अभिनेते नाना पाटेकर यांच्या अचानक निधनाने संपूर्ण कलाविश्व सुन्न झाले आहे. त्यांच्या निधनानंतर राजकीय वर्तुळातूनही तीव्र शोक व्यक्त केला जात असून, राज्याचे मुख्यमंत्री देवेंद्र फडणवीस आणि उपमुख्यमंत्री सुनेत्रा पवार यांनी सोशल मीडियावर भावुक पोस्ट शेअर करत या कलाकाराला श्रद्धांजली वाहिली आहे. पडद्यावरचा ‘नटसम्राट’ आणि शेतकऱ्यांचा पाठीराखा हरपल्याची भावना दोन्ही नेत्यांनी व्यक्त केली आहे. “नाना जितके पडद्यावर मोठे, तितकेच मनानेही मोठे” – फडणवीस मुख्यमंत्री देवेंद्र फडणवीस यांनी नाना पाटेकरांच्या आठवणींना उजाळा देताना म्हटले आहे की, “माझे निकटचे मित्र नाना पाटेकर यांची अकाली आणि अचानक ‘एक्झिट’ मनाला मोठा धक्का देणारी आहे. ‘क्रांतिवीर’ ते ‘नटसम्राट’ या प्रवासात त्यांनी दमदार अभिनयाचा पट उभा केला. पण मी मुख्यमंत्री झाल्यापासून त्यांच्यातील हळवा माणूस कायम पाहत आलो. आम्ही जलयुक्त शिवार अभियान हाती घेतले, तेव्हा नाना स्वतः पुढे आले. मकरंद अनासपुरे आणि त्यांनी सोबत येत ‘नाम फाऊंडेशन’ची स्थापना केली आणि स्वतः शिवारात जाऊन काम केले. यंदाही आपण दुष्काळाचा सामना करत असताना नाना कधीच मागे राहिले नसते, पण ते अचानक सोडून निघून गेले.” “अभिनयाचा एक युगपुरुष हरपला” – उपमुख्यमंत्री सुनेत्रा पवार उपमुख्यमंत्री सुनेत्रा पवार यांनीही नानांच्या निधनावर तीव्र दुःख व्यक्त केले आहे. त्यांनी आपल्या पोस्टमध्ये म्हटले आहे की, “ज्येष्ठ अभिनेते नाना पाटेकर यांच्या निधनाची बातमी मनाला अक्षरशः चटका लावणारी आहे. अभिनयाचा अस्सल आविष्कार आणि संवेदनशील सामाजिक जाणिवांचा सुंदर संगम असलेल्या नानांनी रंगभूमीपासून रुपेरी पडद्यापर्यंत अनेक व्यक्तिरेखा अजरामर केल्या. नाना पाटेकर यांचे दादांशी अतिशय जिव्हाळ्याचे आणि आपुलकीचे संबंध होते. त्यामुळे त्यांच्या निधनाने झालेली पोकळी आमच्या कुटुंबासाठीही विशेष दुःखद आहे.” कलेसोबतच सामाजिक बांधिलकी जपत समाजातील वंचित घटक आणि शेतकरी बांधवांसाठी त्यांनी केलेले कार्य सदैव प्रेरणादायी राहील, अशी भावनाही सुनेत्रा पवार यांनी व्यक्त केली आहे. आज अभिनयविश्वातील एक संवेदनशील मन, एक दमदार आवाज आणि एक अस्सल कलाकार हरपल्याची भावना संपूर्ण राज्यातून व्यक्त होत आहे. महाराष्ट्राचा स्वाभिमान आणि मराठी माणसाचा अभिमान हरपला- एकनाथ शिंदे महाराष्ट्राचा स्वाभिमान आणि मराठी माणसाचा अभिमान आज हरपला, अशा शब्दांत उपमुख्यमंत्री एकनाथ शिंदे यांनी नाना पाटेकर यांच्या निधनावर शोक व्यक्त केला. रंगभूमी आणि चित्रपट क्षेत्रात अभिनयाची उत्तुंग शिखरे गाठणाऱ्या नाना पाटेकरांनी संवादफेक, मुद्राभिनय आणि सामाजिक जाणिवांच्या माध्यमातून स्वतःची स्वतंत्र ओळख निर्माण केली होती. नुकत्याच झालेल्या गणेशोत्सवात नानांसोबत झालेल्या भेटीची आठवण सांगताना शिंदे यांनी त्यांच्या कौतुकाच्या शब्दांचा उल्लेख केला. ‘क्रांतिवीर’, ‘तिरंगा’, ‘प्रहार’, ‘हमिदाबाईची कोठी’, ‘पुरुष’, ‘तन-माजोरी’, ‘देऊळ’, ‘यशवंत’, ‘वजूद’ आणि ‘परिंदा’ यांसारख्या कलाकृतींमधून नानांनी अजरामर भूमिका साकारल्या. कोणताही गॉडफादर नसताना स्वतःच्या अभिनयाच्या ताकदीवर त्यांनी हिंदी चित्रपटसृष्टीत वेगळा ठसा उमटवला आणि मराठी माणसाचा स्वाभिमान जपला. ‘नाम फाउंडेशन’च्या माध्यमातून दुष्काळग्रस्त शेतकऱ्यांसाठी केलेल्या सामाजिक कार्याचाही शिंदे यांनी आवर्जून उल्लेख केला. ‘महाराष्ट्राचा बुलंद, बाणेदार आवाज शांत झाला असून मी एक सच्चा, दिलदार मित्र गमावला आहे. त्यांच्यासारखा अभिनेता शतकातून एकदाच जन्माला येतो,’ अशी भावना व्यक्त करत त्यांनी नानांच्या काश्मीरमधील मुलांसाठी शाळा सुरू करण्याच्या अखेरच्या स्वप्नासाठी सर्वतोपरी मदत करण्याचे आश्वासन दिले. ———– संबंधित बातम्या वाचा.. नाना पाटेकर यांचे वयाच्या 75व्या वर्षी निधन:100 हून अधिक चित्रपट, 3 राष्ट्रीय, 4 फिल्मफेअर पुरस्कार; कारगिल युद्धादरम्यान सैन्यासोबत होते ज्येष्ठ अभिनेते नाना पाटेकर यांचे आज सकाळी निधन झाले. मिळालेल्या माहितीनुसार, त्यांच्या गोव्यातील घरी त्यांना हृदयविकाराचा झटका आला होता. त्यांच्यावर सुमारे 45 मिनिटे सीपीआर (CPR) देण्यात आले, परंतु त्यांचा जीव वाचवता आला नाही. डॉ. शेखर साळकर यांनी दिलेल्या माहितीनुसार, नाना पाटेकर यांचे पहाटे 5वाजून 20 मिनिटांनी निधन झाले. त्यांच्या निधनानंतर वैद्यकीय-कायदेशीर खटला (MLC) दाखल करण्यात आला असून, शवविच्छेदन केले जाईल. सविस्तर वाचा ज्येष्ठ अभिनेते नाना पाटेकर यांचे निधन:संवेदनशील, अष्टपैलू अन् करारी अभिनेता गमावला; नानांच्या निधनावर राजकीय नेत्यांकडून शोक व्यक्त
भारतीय चित्रपटसृष्टीतील अष्टपैलू, दिग्गज आणि आपल्या सखोल अभिनयाने प्रेक्षकांच्या मनावर राज्य करणारे ज्येष्ठ अभिनेते नाना पाटेकर यांचे आज सकाळी निधन झाले आहे. वयाच्या 75 व्या वर्षी त्यांनी गोव्यातील आपल्या निवासस्थानी अखेरचा श्वास घेतला. गोव्यातील घरी असताना त्यांना अचानक तीव्र हृदयविकाराचा झटका आला. प्रकृती खालावल्यामुळे त्यांना तातडीने वैद्यकीय मदत देण्यात आली पण त्यांचा जीव वाचवता आला नाही. त्यांच्या निधनामुळे संपूर्ण कलाविश्वात आणि राजकीय वर्तुळात शोककळा पसरली आहे. सविस्तर वाचा