अमरावती शहर गुन्हे शाखेने घरगुती एलपीजी गॅस सिलींडरमधून गॅस काढून चोरी करणाऱ्या दोन २५ वर्षीय तरुणांना ताब्यात घेतले आहे. महाजनपुरा, माताखिडकी परिसरात हा गोरखधंदा सुरू होता. पोलिसांनी बुधवारी, ७ ऑक्टोबर रोजी ही कारवाई केली. गुन्हे शाखेचे अधिकारी अवैध धंद्यांची तपासणी करत असताना त्यांना गोपनीय माहिती मिळाली. या माहितीनुसार, काही जण ग्राहकांना विकल्या जाणाऱ्या सिलींडरमधून १ ते २ किलो गॅस काढून घेत होते. माहितीची खातरजमा झाल्यावर पथकाने छापा टाकला. छाप्यादरम्यान, एका घरासमोर सिलींडरने भरलेले दोन लोडिंग ऑटो आढळले. घरात मशीन आणि पाईपच्या साहाय्याने गॅस काढताना दोन तरुण पकडले गेले. पोलिसांनी ४४ सिलींडर, तीन गॅस रिफिलिंग मशीन, तीन वजनकाटे आणि दोन लोडिंग ऑटो असा एकूण ९ लाख ५४ हजार रुपयांचा मुद्देमाल जप्त केला. आरोपींना पुढील कारवाईसाठी खोलापुरी गेट पोलिसांच्या ताब्यात दिले आहे.