आंचलने सक्षमच्या प्रेतासोबत विवाह केला होता ..
नांदेड (प्रतिनिधी)-शहरातील मिलिंद नगर परिसरात 27 नोव्हेंबर 2025 रोजी सक्षम गौतम ताटे (वय 20) या युवकाची प्रेमप्रकरणातून हत्या करण्यात आली होती. या घटनेला त्या वेळी ‘ऑनर किलिंग’ असेही संबोधण्यात आले होते. या प्रकरणात आतापर्यंत एकूण नऊ आरोपींना अटक करण्यात आली आहे.
दरम्यान, या प्रकरणात मोक्का (MCOCA) कायदा लागू करण्यात आला असून आज नांदेड येथील सत्र न्यायाधीश आर. एम. शिंदे यांनी एका महिलेसह तीन आरोपींना मोक्का कायद्यांतर्गत चार दिवसांची पोलीस कोठडी सुनावली आहे.
शहरातील इतवारा परिसरातील मिलिंद नगर येथे ही घटना घडली होती. या संदर्भात संगीता गौतम ताटे यांनी दिलेल्या फिर्यादीवरून गुन्हा क्रमांक 360/2025 दाखल करण्यात आला होता. या गुन्ह्याचा प्राथमिक तपास पोलीस उपाधीक्षक प्रशांत शिंदे यांनी केला होता. या प्रकरणात सुरुवातीला सात जणांना अटक करण्यात आली होती. तसेच एका अल्पवयीन विधी संघर्ष बालकासही ताब्यात घेण्यात आले आहे.
प्राप्त माहितीनुसार, आंचल गजानन मामीडवार हिची सक्षम ताटे याच्याशी ओळख होती. ही ओळख पुढे प्रेमसंबंधात परिवर्तित झाली होती. सुरुवातीला या संबंधांना विरोध होता, मात्र काही काळानंतर दोन्ही कुटुंबीयांमध्ये समन्वय झाल्याचे सांगितले जाते. मात्र, नंतर या प्रकरणाला जातीय रंग प्राप्त झाला. त्यानंतर मामीडवार कुटुंबीयांनी सक्षम ताटे याच्याशी आंचलचे लग्न करण्यास नकार दिला. याच कारणातून 27 नोव्हेंबर रोजी सक्षम ताटे याची हत्या करण्यात आली.त्या नंतर आंचलने सक्षमच्या प्रेतासोबत विवाह विधी पार पाडला होता.
या घटनेनंतर प्रकरणात मोक्का कायदा लागू करण्याचा प्रस्ताव पाठविण्यात आला होता. पोलीस महासंचालक कार्यालयाकडून प्रस्तावास मंजुरी मिळाल्यानंतर गुन्ह्यात मोक्काच्या कलमांची भर घालण्यात आली. त्यानंतर या गुन्ह्याचा पुढील तपास भोकर येथील अपर पोलीस अधीक्षक अर्चना पाटील यांच्याकडे वर्ग करण्यात आला.
आज न्यायालयात अर्चना पाटील यांनी केलेल्या सादरीकरणानुसार आरोपी आंचलचे वडील गजानन बालाजीराव मामीडवार, आई जयश्री मदनसिंह ठाकूर उर्फ मामीडवार आणि भाऊ साहिल उर्फ संगीत मदनसिंह ठाकूर उर्फ मामीडवार यांना न्यायालयासमोर हजर करण्यात आले. मोक्का कायद्यांतर्गत पुढील तपासासाठी पोलीस कोठडी देण्याची मागणी करण्यात आली.
सहाय्यक सरकारी वकील ऍड. यादव तळेगावकर यांनी या प्रकरणातील सर्व बाबी न्यायालयासमोर मांडत तपासाची प्रगती होण्यासाठी पोलीस कोठडी आवश्यक असल्याचे सांगितले. त्यानुसार न्यायालयाने तिन्ही आरोपींना 7 फेब्रुवारी 2026 पर्यंत, म्हणजेच चार दिवसांची पोलीस कोठडी सुनावली आहे.
संबंधित बातमी ….
सक्षम ताटे हत्याकांडात आरोपी संख्या नऊवर; आदित्य सोनमनकर 10 डिसेंबरपर्यंत पोलीस कोठडीत
