आज आकाश निरीक्षक आणि खगोलप्रेमींसाठी एक खास दिवस आहे. आज, ६ ऑक्टोबर रोजी आकाशात एक दुर्मीळ खगोलीय घटना घडणार आहे. चंद्र गुरू ग्रहाच्या समोरून जाईल, ज्यामुळे गुरू ग्रह काही काळासाठी चंद्रामागे लपलेला दिसेल. या घटनेला ‘चंद्र-गुरू पिधान’ असे म्हणतात. या पिधान दरम्यान, चंद्राची प्रकाशित कडा गुरू ग्रहाचा भाग झाकण्यास सुरुवात करेल. थोड्याच वेळात गुरू ग्रह चंद्राच्या मागे दिसेनासा होईल. भारतातून ही घटना चंद्र आणि गुरूची अद्भुत जवळीक म्हणून पाहता येईल. दुर्बिणीतून पाहिल्यास गुरूचे चार मोठे उपग्रह आयो, युरोपा, गॅनिमीड आणि कॅलिस्टोदेखील चंद्रामागे जाताना दिसू शकतात. दोन दिवसांपूर्वीच आकाशात शनिचे सुंदर कडेही दिसले होते. ‘पिधान’ म्हणजे जेव्हा एक खगोलीय वस्तू दुसऱ्या वस्तूच्या मागे जाऊन काही काळासाठी दिसेनाशी होते. यात पृथ्वी, चंद्र आणि गुरू एका रेषेत येतात.