साहेबांना 'गिफ्ट' द्यायचे अजितदादांकडून राहून गेले:शेवटच्या क्षणी राष्ट्रवादी एकत्र यावी असा दादांचा आग्रह होता, अंकुश काकडेंनी सांगितला किस्सा

महाराष्ट्राचे उपमुख्यमंत्री अजित पवार यांचा बुधवारी विमान अपघातात दुर्दैवी अंत झाला. त्यांच्या निधनामुळे संपूर्ण महाराष्ट्रात हळहळ व्यक्त केली जात आहे. मुंबईहून बारामतीच्या विमानतळावर लँड करत असतानाच त्यांच्या विमानाचा भीषण अपघात झाला आणि होत्याचे नव्हते झाले. आता अजित पवारांच्या अनेक आठवणी त्यांच्या जवळचे नेते व सहकारी सांगत आहेत. असाच एक किस्सा राष्ट्रवादीचे नेते अंकुश काकडे यांनी सांगितला आहे. 12 डिसेंबरला दोन राष्ट्रवादी एकत्र येण्याचे गिफ्ट शरद पवारांना देण्याचे अजित पवारांच्या मनात होते, असे कांकडे यांनी सांगितले आहे. अजित पवारांची एक आठवण सांगताना अंकुश काकडे म्हणाले, राजकारणातील माझी आणि अजित दादांची सुरुवात एकाच वेळेला झाली. दोघेही जिल्हा बँकेत एकत्रित निवडून आलो. मग राजकारणात अनेक वर्ष काम केले. दादा हे आमचे नेते नेहमी राहिले, पवार साहेबांचा राजकीय वारसा घेऊन दादांनी केलेले काम महाराष्ट्र विसरू शकणार नाही. पण, मला राहून राहून दुःख होतेय की आखेरच्या क्षणाला राष्ट्रवादी एकत्र यावी, असा आग्रह त्यांनी मला केला होता, असे काकडे यांनी सांगितले. ‘दोन्ही राष्ट्रवादी एक कशा होतील यासाठी प्रयत्न करा’ अंकुश काकडे म्हणाले, अजित दादा मला म्हणाले की विठ्ठल शेठ, मणियार, श्रीनिवास पाटील, तुमचे साहेबांशी चांगले संबंध आहेत, साहेबांशी बोला. दोन्ही राष्ट्रवादी एक कशा होतील यासाठी प्रयत्न करा. आम्ही जे प्रयत्न करता येणे शक्य होते ते करत होतो. पण दुर्दैवाने यश आले नाही, अशी माहिती काकडे यांनी दिली. तसेच पुढे त्यांनी सांगितले की, महापालिका निवडणुकांच्या दृष्टीने एकत्र लढण्याचा निर्णय झाला आणि तो वरिष्ठ पातळीवर झाल्याने पुण्यातही झाला. मात्र, ऐनवेळी आमचे अध्यक्ष सोडून गेल्याने आमची थोडी पंचायत झाली. 12 डिसेंबरला एकत्र येणार होतो पुढे बोलताना अंकुश काकडे म्हणाले, अजित दादांशी चर्चा करताना बऱ्यापैकी वाटाघाटी झाल्या होत्या. खरे तर 12 डिसेंबरला एकत्र येणार होतो. पण येऊ शकलो नाही, ठीक आहे, निवडणुकीनंतर एकत्र येऊ, असेही दादांनी म्हटल्याचे काकडे यांनी सांगितले. विशेष म्हणजे 12 डिसेंबर हा शरद पवारांचा वाढदिवस, म्हणजे अजित पवारांना शरद पवारांना वाढदिवसाचे हे गिफ्ट द्यायचे होते, हेच यावरून स्पष्ट होते.