सेनगाव नगरपंचायतीच्या नगराध्यक्षपदी ठाकरे गटाच्या यमुनाबाई देशमुख तर उपनगराध्यक्षपदी शिलानंद वाकळे यांची शुक्रवारी ता. ९ निवड झाली आहे. या निवडीच्या घोषणानंतर ठाकरे गटाच्या पदाधिकारी व कार्यकर्त्यांनी एकच जल्लोष केला.
.
सेनगाव नगर पंचायतीमध्ये ठाकरे गटाचे पाच, राष्ट्रवादीचे (अजित पवारगट) पाच, काँग्रेस दोन तर भाजपाचे पाच सदस्य आहेत. अध्यक्षपदासाठी ठाकरे गटाच्या यमुनाबाई देशमुख तर भाजपाच्या मिराबाई खाडे यांनी अर्ज दाखल केले होते. त्यानंतर आज पिठासन अधिकारी तथा तहसीलदार सखाराम मांडवगडे, प्रभारी मुख्याधिकारी अरविंद मुंडे यांच्या अध्यक्षतेखाली नगराध्यक्ष व उपनगराध्यक्षपदासाठी आज बैठक झाली.
यावेळी हातवर करून मतदान घेण्यात आले. यामध्ये ठाकरे गटाच्या देशमुख यांना ११ तर भाजपाच्या खाडे यांना पाच मते मिळाली. उपनगराध्यक्षपदासाठी ठाकरे गटाचे शिलानंद वाकळे व भाजपाचे अमोल तिडके यांनी उमेदवारी अर्ज दाखल केले होते. यामध्ये वाकळे यांना ११ तर तिडके यांना पाच मते मिळाली. या निवडणुकीच्या वेळी काँग्रेसच्या एका सदस्याने ठाकरे गटाच्या बाजूने मतदान केले तर एक सदस्य गैरहजर होता.
दरम्यान, पिठासन अधिकारी मांडवगडे, मुख्याधिकारी मुंडे यांनी नगराध्यक्षपदी देशमुख व उपनगराध्यक्षपदी वाकळे यांच्या निवडीची घोषणा करताच नगरपंचायत परिसरात ठाकरे गटाच्या पदाधिकारी व कार्यकर्त्यांनी एकच जल्लोष केला. यावेळी नुतन नगराध्यक्ष व उपनगराध्यांचा सत्कार करण्यात आला. नुतन अध्यक्ष व उपनगराध्यक्षांना आता सव्वा वर्षाचा कार्यकाळ मिळणार असून या कालावधीत पिण्याचे पाणी, शहर स्वच्छतेसह नागरी सुविधा देण्यासाठी काम करावे लागणार आहे.
