मुंबई येथील कुर्ला आणि विद्याविहार रेल्वे स्थानाकादरम्यान कचरा उचलणाऱ्या लोकल ट्रेनला अचानक मोठी आग लागल्याची घटना घडली आहे. ऐन गर्दीच्या वेळी ही घटना घडल्याने एकच खळबळ उडाली आहे. या दुर्घटनेत लोकल ट्रेनचा एक संपूर्ण डब्बा जळाला असल्याचे समजते. सुदैव
.
मिळालेल्या माहितीनुसार, कुर्ला येथील सायडिंगमध्ये उभ्या असलेल्या कचरा लोकल ट्रेनच्या दुसऱ्या डब्याला आग लागली आहे. आग आटोक्यात आणण्यासाठी अग्निशमन दल तातडीने घटनास्थळी दाखल झाले आहे. अग्निशमन दलाच्या जवनांकडून आग विझवण्यासाठी शर्थीचे प्रयत्न केले. या घटनेमुळे सुरक्षेच्या कारणास्तव साधारण पावणे नऊ वाजल्यापासून अप स्लो लोकल मार्गावरील रेल्वे वाहतूक तात्पुरती बंद करण्यात आली आहे. यामुळे मध्य रेल्वेच्या विद्याविहार रेल्वे स्थानाकाकडून छत्रपती शिवाजी महाराज टर्मिनसच्या दिशेने जाणारी स्लो लोकल ट्रेन वाहतूक तात्पुरती बंद ठेवण्यात आली असल्याची माहिती आहे.
रेल्वे प्रशासनाकडून या घटनेची माहिती देण्यात आली असून या आगीची घटना 8 वाजून 38 मिनिटांनी समोर आली होती. यानंतर अवघ्या काही मिनिटांत अग्निशामक दलाच्या जवानांनी आगीवर नियंत्रण मिळवले. 8 वाजून 55 मिनिटांनी आगीवर नियंत्रण मिळवण्यात अग्निशमन दलाला यश आले. त्यानंतर वाहतूक सुरळीत करण्याचे काम सुरू करण्यात आल्याची माहिती रेल्वे प्रशासनाने दिली आहे.
दरम्यान, ही आग नेमकी का लागली, याचे कारण अद्याप स्पष्ट झालेले नाही. मुंबईची लोकल ही मुंबईकरांची लाइफलाइन समजली जाते. दररोज लाखो प्रवासी या लोकलमधून प्रवास करत असतात. तसेच लोकलच्या वेळापत्रकानुसार मुंबईकरांचा दिवस ठरलेला असतो. परंतु, अशा काही घटना घडल्या की प्रवाशांना नाहक त्रासाला सामोरे जावे लागते.
