पुणे शहरातील कोंढवा पोलिस ठाण्याच्या हद्दीत काकडे वस्ती, गल्ली नंबर २ येथे गुरुवारी मोठी प्रतिबंधात्मक कारवाई करण्यात आली. सहाय्यक पोलिस निरीक्षक अफरोज पठाण आणि डीबी पथकाने संयुक्तपणे केलेल्या या कारवाईत मोठ्या प्रमाणात बेकायदेशीर दारूसाठा आणि एक कोट
.
या कारवाईदरम्यान विविध प्रकारची देशी आणि विदेशी दारू आढळून आली. यामध्ये ५० एमएलचे ८० फुगे (किंमत ₹१,६००), ७० लिटर दारू (₹२८,०००), २२० नग नंबर १ व्हिस्की (₹४८,४००), १८३ नग आयबी व्हिस्की (₹४०,२६०), २२४ नग आर.एस. १८० एमएल (₹५६,०००) आणि इतर अनेक ब्रँड्सच्या दारूचा समावेश होता. जप्त केलेल्या दारूसाठ्याची एकूण किंमत २ लाख ५ हजार ९०० रुपये इतकी आहे.
दारूसाठ्यासोबतच सुरुवातीला १ लाख ४१ हजार ५० रुपये रोख रक्कमही जप्त करण्यात आली. त्यामुळे दारूसाठा आणि ही रोख रक्कम मिळून एकूण ३ लाख ४६ हजार ९५० रुपयांचा मुद्देमाल पोलिसांनी ताब्यात घेतला.
या प्रकरणात अमर कौर उर्फ मद्रीकौर दादासिंग जुनी, दिलदार सिंग दादासिंग जुनी आणि देवाश्री जुनी सिंग हे तिघे बेकायदेशीर दारू विक्री करत असल्याचे निष्पन्न झाले. त्यांच्या ताब्यात रोख रक्कम आढळून आल्याने देवाश्री जुनी सिंग हिच्या राहत्या घराची झडती घेण्यात आली. या झडतीदरम्यान बेडरूममधील कपाटाच्या वेगवेगळ्या कप्प्यांमध्ये लपवून ठेवलेली तब्बल १ कोटी ८५ हजार ९५० रुपये इतकी रोख रक्कम आढळून आली.
सदर रक्कम पंचनामा करून जप्त करण्यात आली आहे. या मोठ्या कारवाईमुळे परिसरात खळबळ उडाली असून, कोंढवा पोलिस पुढील तपास करत आहेत.
