साताऱ्यातील एका दोन वर्षांच्या बाळाने खेळता खेळता नजरचुकीने ॲसिटिक ॲसिड गिळल्याने त्याची प्रकृती गंभीर झाली होती. पुण्यातील अंकुरा हॉस्पिटल फॉर वुमन अँड चिल्ड्रनमधील डॉक्टरांच्या टीमने यशस्वी उपचार करून या बाळाचा जीव वाचवला.
.
ही घटना बालदिनाच्या दिवशी घडली. बाळाने पिण्याच्या पाण्याच्या बाटलीत ठेवलेले ॲसिड गिळले होते. यामुळे त्याचे ओठ, तोंड, अन्ननलिका, छाती, जननेंद्रिय आणि जांघा गंभीर भाजल्या होत्या.
ॲसिड गिळल्यानंतर बाळाला तात्काळ साताऱ्यातील रुग्णालयात दाखल करण्यात आले. तेथील डॉ. घोरपडे यांनी परिस्थितीचे गांभीर्य ओळखून पुण्यातील अंकुरा हॉस्पिटलशी संपर्क साधला. डॉ. मिलिंद जंबगी यांच्या नेतृत्वाखालील टीमने विशेष रुग्णवाहिकेत व्हेंटिलेटर सपोर्टवर बाळाला सुरक्षितपणे पुण्यात आणले.
अंकुरा हॉस्पिटलमध्ये दाखल झाल्यावर करण्यात आलेल्या एंडोस्कोपिक तपासणीत बाळाच्या अन्ननलिकेला गंभीर इजा झाल्याचे समोर आले. बालरोग अतिदक्षता विभागात त्याला २४ तास निरीक्षणाखाली ठेवण्यात आले. व्हेंटिलेटर सपोर्ट, विशेष ड्रेसिंग आणि औषधोपचार करून श्वसनमार्गातील अडथळा आणि संसर्ग टाळण्यात डॉक्टरांना यश आले.
डॉ. मिलिंद जंबगी यांनी सांगितले की, “ॲसिड सेवन जीवघेणे ठरू शकते. या बाळाच्या बाबतीत, आम्हाला एकाच वेळी श्वसनमार्गातील जखमा व अडथळा, अन्ननलिकेला झालेली इजा आणि इतर बाह्य जखमा या तिन्ही समस्यांना तोंड द्यावे लागले.” त्यांनी पुढे सांगितले की, “आम्ही श्वसन, पोषण आणि जखमा भरून काढण्यावर लक्ष केंद्रित केले. सुरुवातीला नळीद्वारे, नंतर तोंडावाटे आहार दिला.”
उपचारांना सकारात्मक प्रतिसाद देत बाळ व्हेंटिलेटरमुक्त झाले आणि त्याच्या जखमा भरू लागल्या. एका आठवड्यात बाळाला रुग्णालयातून घरी सोडण्यात आले. डॉक्टरांनी पालकांना आवाहन केले आहे की, घरातील रसायने, ॲसिडयुक्त पदार्थ आणि औषधे मुलांच्या हाती लागणार नाहीत अशा सुरक्षित ठिकाणी ठेवावीत.
