उद्धव ठाकरेंना अमरावतीत मोठा धक्का, जिल्हाप्रमुखांचा राजीनामा, शिंदे सेनेत जाणार?:बच्चू कडूंच्या संपर्कानंतर मोठी घडामोड
राज्यात विधान परिषद निवडणुकीच्या पार्श्वभूमीवर राजकीय हालचालींना वेग आला असतानाच अमरावतीत शिवसेना ठाकरे गटाला मोठा धक्का बसला आहे. पक्षाचे अमरावती जिल्हाप्रमुख नरेंद्र पडोळे यांनी आपल्या पदाचा राजीनामा दिल्याने राजकीय वर्तुळात खळबळ उडाली आहे. अर्ज माघारीच्या शेवटच्या दिवशी ही घडामोड घडल्याने त्याकडे विशेष लक्ष वेधले गेले. पडोळे हे लवकरच उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करणार असल्याची माहिती समोर येत असून त्यामुळे अमरावतीतील राजकीय समीकरणांमध्ये मोठा बदल होण्याची शक्यता व्यक्त केली जात आहे. मिळालेल्या माहितीनुसार, नरेंद्र पडोळे यांनी पक्षातील अंतर्गत गटबाजी आणि स्थानिक पातळीवरील नाराजीमुळे राजीनामा दिल्याची चर्चा सुरू आहे. त्यांनी जिल्हाप्रमुख पदाचा राजीनामा दिल्यानंतर ठाकरे गटात अस्वस्थतेचे वातावरण निर्माण झाले आहे. विशेष म्हणजे अचलपूर आणि मेळघाट विधानसभा क्षेत्रातील संघटनात्मक जबाबदारी त्यांच्याकडे होती. आगामी जिल्हा परिषद आणि स्थानिक स्वराज्य संस्थांच्या निवडणुकांच्या तोंडावर झालेली ही घडामोड ठाकरे गटासाठी चिंतेची बाब मानली जात आहे. गेल्या काही महिन्यांपासून ठाकरे गटातील अनेक पदाधिकारी आणि कार्यकर्ते पक्ष सोडून शिंदे गट किंवा भाजपमध्ये प्रवेश करत असल्याचे चित्र दिसत आहे. त्यात आता अमरावतीतील या मोठ्या राजीनाम्याची भर पडली आहे. त्यामुळे या भागात ठाकरे गटाची संघटनात्मक ताकद कमी होण्याची शक्यता व्यक्त केली जात आहे. दुसरीकडे, शिंदे गट मात्र सातत्याने आपला विस्तार करत असून नव्या नेत्यांना पक्षात सामावून घेण्यावर भर देत आहे. राजीनाम्यापूर्वी बच्चू कडू यांच्यासोबत चर्चा दरम्यान, बच्चू कडू यांनी शिंदे गटासोबत जवळीक वाढवल्यानंतर अमरावती विभागातील राजकीय समीकरणांमध्ये बदल होऊ लागल्याची चर्चा आहे. बच्चू कडू यांच्यासोबत मोठ्या प्रमाणात कार्यकर्त्यांनीही शिंदे सेनेत प्रवेश केला होता. आता नरेंद्र पडोळे हे देखील बच्चू कडू यांच्या नेतृत्वाखाली शिंदे गटात प्रवेश करतील, अशी माहिती सूत्रांकडून दिली जात आहे. पडोळे यांच्या राजीनाम्यापूर्वी बच्चू कडू यांच्यासोबत त्यांची चर्चा झाल्याचेही बोलले जात आहे. त्यामुळे या निर्णयामागे नेमके कोणते राजकीय गणित आहे, याबाबत विविध तर्कवितर्क लावले जात आहेत.