नातेवाईकांकडे जेवणाचा बहाणा अन् थेट मंदिरात लग्न:विवाहाला विरोध करताच अल्पवयीन नवरीला मारहाण, कुरुंदा पोलिसांत पतीसह 12 जणांवर गुन्हा दाखल
कुरुंदा पोलिस ठाण्यांतर्गत एका गावातून धोंडे जेवणाला पाहूण्यांकडे जाण्याचे सांगत अल्पवयीन मुलीस थेट सोलापूर येथे नेऊन विवाह लावून दिल्याचा प्रकार घडला आहे. या प्रकरणी बारा जणांवर मंगळवारी ता. 2 रात्री गुन्हा दाखल झाला आहे. यामध्ये सहा महिलांचा समावेश आहे. पोलिसांनी दिलेल्या माहितीनुसार, एक अल्पवयीन मुलगी लहानपणापासूनच तिच्या आजोळी शिक्षणासाठी राहात होती. ता. 22 मे रोजी त्या मुलीच्या शेजारी राहणाऱ्या महिलेने मुलीस व तिच्या आजीला वसमत येथे पाहूण्यांकडे धोंडे खायला जाऊन येऊ असे सांगत दोघींना सोबत घेतले. वसमत येथे गेल्यानंतर त्या ठिकाणी पुन्हा दोन महिला व एक पुरुष त्यांच्या सोबत आला. त्यानंतर त्या सर्वांनी त्या मुलीस व तिच्या आजीला तुळजापूर येथेही धोंडे जेवण करू व देवदर्शन करून येऊ असे सांगत तुळजापूर येथे नेले. दरम्यान, त्या ठिकाणी या महिलांनी अक्षय कोकणे नावाच्या तरुणाशी व त्याच्या कुटुंबियांशी संपर्क साधला. त्यानंतर मुलगी सज्ञान असल्याचे दाखविण्यासाठी मुलीचे बनावट आधारकार्ड तयार केले. त्या ठिकाणी तयार केलेले आधारकार्ड दाखवून त्यांनी त्या मुलीचा एका मंदिरात नेऊन अक्षय सोबत विवाह लाऊन दिला. विवाहानंतर अक्षय याने मुलीसोबत जवळीक साधण्याचा प्रयत्न केला मात्र मुलीने विरोध केल्यानंतर अक्षय याने मुलीस मारहाण केली. दरम्यान, त्या मुलीच्या आई, वडिलांनी मुलीस गावाकडे पाठविण्यासाठी तिच्या आजीसोबत कुरुंदा येथे संपर्क साधला. मात्र आजीकडून योग्य प्रतिसाद मिळाला नसल्याने त्यांना शंका आली. त्यांनी कुरुंदा येथे येऊन चौकशी केली असता मुलीचा सोलापूर येथे विवाह लावल्याचे स्पष्ट झाले. त्या मुलीच्या वडिलांनी अक्षय याच्याशी संपर्क साधून खरा प्रकार सांगितल्यानंतर अक्षय याने त्यांच्याकडे दोन लाख रुपयांची मागणी केली. या प्रकरणी त्या मुलीच्या वडिलांनी सोलापूर एमआयडीसी पोलिस ठाण्यात तक्रार दाखल केली. मात्र मुळ प्रकार कुरुंदा येथे घडल्याने सोलापूर पोलिसांनी तक्रार कुरुंदा पोलिसांकडे वर्ग केली. त्यावरून कुरूंदा पोलिसांनी अक्षय कोकणे याच्यासह त्याची आई, भाऊ, वडिल एक महिला(रा. सोलापूर) यांच्यासह वसमत येथील तीन व कुरुंदा येथील एक महिला अशा एकूण 12 जणांवर गुन्हा दाखल केला आहे. सहाय्यक पोलिस निरीक्षक रामदास निरदोडे, उपनिरीक्षक कारामुंगे पुढील तपास करीत आहेत.