विकसित भारतासाठी प्रत्येकाचे योगदान महत्त्वाचे- अविनाश धर्माधिकारी:पुणे मॅनेजमेंट असोसिएशनचा ४९वा स्थापना दिन ‘विकसित भारत’ संकल्पनेवर साजरा

निवृत्त सनदी अधिकारी अविनाश धर्माधिकारी यांनी ‘विकसित भारता’साठी प्रत्येकाच्या योगदानावर भर दिला. पुणे मॅनेजमेंट असोसिएशनच्या (पीएमए) ४९व्या स्थापना दिनानिमित्त आयोजित कार्यक्रमात ते बोलत होते. शाश्वत विकास आणि भारतीय तत्त्वज्ञान हे विकसित भारताच्या निर्मितीचे आधारस्तंभ असल्याचे त्यांनी नमूद केले. हा स्थापना दिन ‘विकसित भारत’ या संकल्पनेवर आधारित होता. सीपीआर ऑडिटोरियम, पाषाण रोड गणेशखिंड येथे बुधवारी हा कार्यक्रम पार पडला. यावेळी समूहाचे व्यवस्थापकीय संचालक आदित्य पित्ती, पूना ॲब्रेसिव्हजचे संस्थापक व अध्यक्ष वीरेंद्र सूद आणि बँक ऑफ महाराष्ट्रचे संचालक प्रसेनजीत फडणवीस प्रमुख उपस्थित होते. पीएमएचे अध्यक्ष बाळ पाटील, उपाध्यक्ष प्रदीप तुपे आणि राहुल जोशी मंचावर उपस्थित होते. धर्माधिकारी पुढे म्हणाले की, मानवाचा विकास साधताना केवळ भौतिक आणि आर्थिक कल्याणाऐवजी मानसिक, मनोवैज्ञानिक आणि आध्यात्मिक कल्याणाला महत्त्व दिल्यास विकसित भारताचे स्वप्न साकारण्यात कोणताही अडथळा येणार नाही. पाश्चात्त्य संस्कृतीच्या अंधानुकरणामुळे मानवजात विनाशाच्या उंबरठ्यावर पोहोचली आहे, ज्यामुळे निसर्गाची अनिर्बंध लूट होऊन पर्यावरणाचा ऱ्हास होत आहे. मात्र, विकासाचा भारतीय दृष्टिकोन यापेक्षा वेगळा आहे. बँक ऑफ महाराष्ट्रचे संचालक प्रसेनजीत फडणवीस यांनी ‘विकसित भारत २०४७’ चे ध्येय गाठण्यासाठी शिक्षण आणि बँकिंग क्षेत्राची भूमिका अधोरेखित केली. बँकिंग हे देशाच्या अर्थव्यवस्थेचा कणा आहे, तर शैक्षणिक क्षेत्रातील युवा पिढी २०४७ च्या विकसित भारताचे स्वप्न साकार करण्यासाठी महत्त्वपूर्ण योगदान देईल, असे ते म्हणाले. समूहाचे व्यवस्थापकीय संचालक आदित्य पित्ती यांनी विकसित भारताचे स्वप्न साकार करताना सरकारचे विविध उपक्रम, त्यांचे सखोल विश्लेषण आणि धोरणात्मक आराखडा याविषयी माहिती दिली. विकसित पुणे हे विकसित भारताच्या निर्मितीमध्ये मोलाचा वाटा उचलेल, असा विश्वासही त्यांनी व्यक्त केला. पूना ॲब्रेसिव्हजचे संस्थापक व अध्यक्ष वीरेंद्र सूद यांनी देशाला विकसित करण्यासाठी पर्यायी ऊर्जा स्रोतांवर काम करण्याची गरज व्यक्त केली. सौर, पवन आणि जलऊर्जेमध्ये तांत्रिकदृष्ट्या अधिक विकास साधणे आवश्यक आहे. भारताची बँकिंग प्रणाली जागतिक प्रणालीशी समन्वय साधल्याशिवाय आणि संशोधन व विकास (RD) क्षेत्रात भरीव कार्य घडल्याशिवाय पुरेसा विकास साधला जाणार नाही, असेही त्यांनी नमूद केले.