पुणे सीमाशुल्क आयुक्तालयाकडून 76 कोटींचे अंमली पदार्थ नष्ट:देशव्यापी मोहिमेत 780 किलो अंमली पदार्थांच्या साठ्याची विल्हेवाट
पुणे सीमाशुल्क आयुक्तालयाने अंमली पदार्थ विरोधी देशव्यापी मोहिमेअंतर्गत मोठी कारवाई केली आहे. या कारवाईत ७६.०२ कोटी रुपये आंतरराष्ट्रीय बाजारमूल्य असलेले अंमली पदार्थ नष्ट करण्यात आले. सीमाशुल्क विभाग आणि महसूल गुप्तवार्ता संचनालय (DRI), पुणे यांनी जप्त केलेला हा साठा होता. एकूण सतरा वेगवेगळ्या गुन्ह्यांमध्ये जप्त करण्यात आलेला हा अंमली पदार्थांचा आणि सायकोट्रॉपिक घटकांचा साठा होता. अंमली पदार्थ आणि मनोव्यापारांवर परिणाम करणारे पदार्थ कायदा, १९८५ च्या कलम ५२ए अंतर्गत ही पूर्व-चाचणी विल्हेवाट लावण्यात आल्याची माहिती पुणे सीमाशुल्क आयुक्तालयाने दिली. या धडक कारवाईत एकूण ८७०.६३ किलो वजनाच्या अंमली पदार्थांचा नाश करण्यात आला. यामध्ये विविध प्रकारच्या घातक अंमली पदार्थांचा समावेश होता. जप्त केलेल्या साठ्यात सर्वाधिक प्रमाण गांजा आणि गांजाच्या बियांचे होते, ज्यांचे एकूण वजन ७९४.७४ किलो होते. याशिवाय, ५८.९० किलो हायड्रोपोनिक वीड, ११.६० किलो मेफेड्रोन (एमडी), ५.२३ किलो डाय-एसिटिल मॉर्फिन (हेरॉइन), ०.१२ किलो अफू आणि ०.०४ किलो मॉर्फिन, कोडीन व पापावेरीन यांसारख्या अंमली पदार्थांचीही विल्हेवाट लावण्यात आली. या सर्व जप्त केलेल्या अंमली पदार्थांची अवैध जागतिक बाजारपेठेतील एकूण किंमत सुमारे ७६ कोटी २ लाख रुपये अंदाजित करण्यात आली होती. सीमाशुल्क विभाग आणि महसूल गुप्तवार्ता संचनालयाच्या पुणे पथकाने विविध छाप्यांमध्ये आणि तस्करांच्या अड्ड्यांवरून हा मुद्देमाल जप्त केला होता. सुरक्षेच्या आणि पर्यावरणपूरक नियमांचे पालन करत, पुणे जिल्ह्यातील रांजणगाव औद्योगिक वसाहतीमधील मेसर्स महाराष्ट्र एन्व्हायरॉ पॉवर लिमिटेड या कंपनीच्या कारखान्यात हा संपूर्ण साठा भट्ट्यांमध्ये जाळून नष्ट करण्यात आला.
