.

माजी आमदार सुरेश वरपुडकर यांच्या सोबत परभणी आणि हिंगोली जिल्ह्यातील अनेक पदाधिकारी आणि माजी नगरसेवकांनी भारतीय जनता पक्षामध्ये प्रवेश केला. ‘सबका साथ, सबका विकास आणि सबका प्रयास’ या माध्यमातून परभणी जिल्ह्यातील तळागाळातील शेवटच्या माणसापर्यंत विकास पोहोचवण्याचे आवाहन या वेळी भाजपचे प्रदेश अध्यक्ष रवींद्र चव्हाण यांनी केले आहे. सुरेश वरपुडकर यांना प्रचंड अनुभव आहे. असे व्यक्ती आमच्याबरोबर हातात घालून नागरिकांच्या आणि जनतेच्या हितासाठी एकत्र येऊन काम करायला लागले तर येणाऱ्या काळ महाराष्ट्रासाठी अत्यंत लाभदायक राहील, अशी अपेक्षा त्यांनी व्यक्त केली.

या वेळी भाजपचे प्रदेशाध्यक्ष रवींद्र चव्हाण यांच्यासह मंत्री चंद्रशेखर बावनकुळे, मंत्री अतुल सावे, मंत्री तथा परभणीच्या पालकमंत्री मेघना बोर्डीकर यांची देखील प्रमुख उपस्थिती होती. या सर्वांनीच वरपुडकर यांचे पक्षात स्वागत केले आहे. तसेच आगामी काळात परभणी जिल्ह्यात पक्ष अधिक मजबूत करण्याचे आवाहन केले.

आणखी एक मोठा धक्का बसण्याची शक्यता

मराठवाड्यामध्ये काँग्रेस पक्षाला आणखी एक मोठा धक्का बसण्याची शक्यता वर्तवली जात आहे. काँग्रेसचे माजी आमदार आणि प्रदेश उपाध्यक्ष कैलास गोरंट्याल हे भारतीय जनता पक्षाच्या वाटेवर असल्याची माहिती समोर आली आहे. गोरंट्याल हे भारतीय जनता पक्षाच्या बड्या नेत्यांच्या संपर्कात असल्याचे देखील सांगण्यात येत आहे. गोरंट्याल यांनी भाजपमध्ये प्रवेश केला तर मराठवाड्यात काँग्रेस पक्षाला मोठा झटका मानला जाईल. विधानसभा निवडणुकीमध्ये कैलास गोरंट्याल यांना काँग्रेस पक्षाने उमेदवारी दिली होती. मात्र या निवडणुकीत त्यांना पराभव स्विकारावा लागला. या पराभवानंतर गोरंट्याल यांनी विधानसभा निवडणुकीत पक्षांतर्गत पदाधिकाऱ्यांनी विरोधात काम केले असल्याची तक्रार पक्षाकडे केली होती. मात्र त्यांना पक्ष श्रेष्ठींकडून अपेक्षित अशी साथ मिळाली नाही. त्यामुळे त्यांनी या आधीच थेट नाराजी देखील व्यक्त केली होती. तेव्हापासूनच ते भारतीय जनता पक्षात जाणार असल्याची चर्चा सुरू झाली आहे.