शिवसेना ठाकरे गटाला मोठा धक्का!:माजी महापौर विशाखा राऊत यांचे जात प्रमाणपत्र रद्द, शिंदे गटाला लॉटरी लागण्याची शक्यता

मुंबईत उद्धव ठाकरे यांच्या शिवसेनेला मोठा धक्का बसला असून, दादर परिसरातील नगरसेविका आणि मुंबईच्या माजी महापौर विशाखा राऊत यांचे जात प्रमाणपत्र रद्द करण्यात आले आहे. पालघर उपविभागीय अधिकाऱ्यांनी दिलेले हे जात प्रमाणपत्र सक्षम प्राधिकाऱ्याने दिले नसल्याचे जातपडताळणी समितीने नमूद केले आहे. त्यामुळे आता त्यांच्या नगरसेवकपदावर टांगती तलवार निर्माण झाली असून, त्यांच्या पदाबाबतचा अंतिम निर्णय पालिका सभागृहात घेतला जाणार आहे. विशाखा राऊत यांनी दादरमधील प्रतिष्ठेच्या मानल्या जाणाऱ्या प्रभाग क्रमांक 191 मधून निवडणूक लढवली होती. या निवडणुकीत त्यांनी उपमुख्यमंत्री एकनाथ शिंदे यांच्या शिवसेनेचे आमदार सदा सरवणकर यांच्या कन्या प्रिया सरवणकर गुरव यांचा पराभव केला होता. जर पालिका सभागृहाने राऊत यांचे पद रद्द केले, तर या निवडणुकीत दुसऱ्या क्रमांकाची मते मिळवणाऱ्या प्रिया सरवणकर यांना नगरसेविका म्हणून संधी मिळण्याची दाट शक्यता आहे. असे झाल्यास मुंबईत शिंदे गटाला मोठी लॉटरी लागून त्यांचे संख्याबळ वाढू शकते. समितीचा निर्णय आणि अपिलाची संधी विशाखा राऊत यांनी कुणबी जात वैधता प्रमाणपत्र सादर केले होते. मात्र, सादर केलेल्या कागदपत्रांमधून कुणबी जात प्रमाणपत्रधारकांशी त्यांचे रक्ताचे नाते सिद्ध करता आले नसल्याचा ठपका समितीने आपल्या आदेशात ठेवला आहे. पालघर जिल्हाधिकाऱ्यांनी हे प्रमाणपत्र अवैध ठरवले असले तरी, महाराष्ट्र जात प्रमाणपत्र कायद्यातील तरतुदीनुसार राऊत यांना या निर्णयाविरोधात विभागीय आयुक्तांकडे दाद मागण्यासाठी 90 दिवसांचा कालावधी उपलब्ध आहे. विशाखा राऊत यांचे स्पष्टीकरण जात प्रमाणपत्र रद्द करण्याच्या निर्णयानंतर विशाखा राऊत यांनी आपली बाजू मांडत समितीच्या कामकाजावर नाराजी व्यक्त केली. आपण स्वतःच्या आजोबांचे 1911 सालचे पुरावे आणि जुन्या नोंदी समितीसमोर कायदेशीररीत्या सादर केल्या होत्या, असे त्यांनी सांगितले. तसेच, हे महत्त्वाचे पुरावे मोडी लिपीत होते, मात्र समितीने या मोडी लिपीतील पुराव्यांना ग्राह्य न धरता आपला निर्णय दिल्याचे राऊत यांनी स्पष्ट केले. शिंदे गटावर राजकीय दबावाचा आरोप हा निर्णय राजकीय हेतूने प्रेरित असल्याचा गंभीर आरोप राऊत यांनी केला आहे. जातपडताळणी समितीवर एकनाथ शिंदे यांच्या शिवसेनेचा मोठा दबाव असल्याचा दावा त्यांनी केला. सध्या न्यायालयात जात प्रमाणपत्रांशी संबंधित एकूण 84 प्रकरणे प्रलंबित असताना केवळ ठाकरे गटाशी संबंधित प्रकरणांवर जाणीवपूर्वक निर्णय दिले जात असल्याचे त्या म्हणाल्या. तसेच, सदा सरवणकर यांनी महिनाभरापूर्वीच आपली मुलगी नगरसेविका होणार असल्याचे भाकीत केले होते, त्यामुळे यामागे शिंदे गटाचा थेट दबाव असल्याचे उघड होत असल्याचा आरोपही त्यांनी केला.