गोरे आणि राऊत यांची कायदेशीर लढाई सुरूच:चाकणकरांच्या वकिलांनी न्यायालयाच्या आदेशावर बोलण्यास नकार दिल्याचा ठोंबरे-पाटील यांचा आरोप

महाराष्ट्र राज्य महिला आयोगाच्या माजी अध्यक्षा रूपाली चाकणकर यांच्याशी संबंधित प्रकरणातील जामीन अर्जाच्या सुनावणीच्या पार्श्वभूमीवर पुणे जिल्हा न्यायालयाच्या आवारात दोन्ही बाजूंकडून भूमिका मांडण्यात आल्या. चाकणकर यांच्या वतीने ॲड. जयश्री पालवे यांनी माध्यमांशी संवाद साधला. दरम्यान, रूपाली ठोंबरे-पाटील यांनी मिलिंद गोरे आणि सपना राऊत यांच्यावरील कारवाईच्या मुद्द्यावरून चाकणकर यांच्यावर टीका केली. मिलिंद गोरे आणि सपना राऊत यांच्याविरोधातील प्रकरणावर भाष्य करताना ठोंबरे-पाटील म्हणाल्या की, रूपाली चाकणकर यांनी त्यांना खोट्या प्रकरणांत अडकवल्याचा आरोप असून, या दोघांची कायदेशीर लढाई सुरू आहे. संबंधित प्रकरणात सुरुवातीला अंतरिम जामीन देण्यात आला होता. मात्र, त्यानंतर काल अटकपूर्व जामीन अर्ज फेटाळण्यात आल्याचे त्यांनी सांगितले. न्यायालयीन प्रक्रियेदरम्यान न्यायालय बदलले असले, तरी न्यायालयाच्या आदेशात नेमके काय म्हटले आहे, याबाबत चाकणकर यांच्या वकील स्पष्टपणे सांगण्यास तयार नसल्याचा आरोपही ठोंबरे-पाटील यांनी केला. जामीन नाकारला म्हणजे आरोपी दोषी ठरत नाही सत्र न्यायालयाने जामीन अर्ज फेटाळल्यास उच्च न्यायालयात दाद मागण्याचा पर्याय उपलब्ध असतो, याकडे ठोंबरे-पाटील यांनी लक्ष वेधले. जामीन अर्ज फेटाळला जाणे म्हणजे संबंधित व्यक्ती गुन्ह्यात दोषी ठरली, असा त्याचा अर्थ होत नाही, असेही त्यांनी स्पष्ट केले. मिलिंद गोरे आणि सपना राऊत यांनी कोणत्याही प्रकारच्या अश्लील टिप्पण्या केल्या नसल्याचा दावा ठोंबरे-पाटील यांनी केला. अशा टिप्पण्यांची नोंदही उपलब्ध नसल्याचे त्या म्हणाल्या. सोशल मीडियावरील आरोप-प्रत्यारोपांबाबत बोलताना त्यांनी चाकणकर आणि ॲड. पालवे यांनी सोशल मीडियावर भूमिका मांडल्यास त्याला त्याच माध्यमातून जशास तसे उत्तर दिले जाईल, असा इशारा दिला.