अमरावती जिल्ह्यातील तिवसा तालुक्यातील ग्रामीण भागातील खराब रस्त्यांमुळे नागरिकांना त्रास होत आहे. याची दखल घेत वंचित बहुजन आघाडीने रस्ते आणि पुलांच्या दुरुस्तीची मागणी केली आहे. वंचित बहुजन आघाडीच्या युवा आघाडीचे जिल्हा महासचिव सागर भवते आणि त्यांच्या सहकाऱ्यांनी जिल्हा परिषदेच्या बांधकाम विभागाच्या कार्यकारी अभियंत्यांची भेट घेतली. यावेळी त्यांनी एक निवेदन सादर केले आणि विकास कामांना गती देण्याची मागणी केली. निवेदनानुसार, काटसूर ते सुलतानपूर रस्ता खराब झाला आहे, त्याचे खडीकरण करून दुरुस्ती करावी. तसेच सुलतानपूरहून बोडखा गावाकडे जाणाऱ्या रस्त्याची आणि इतर खराब रस्ते व पुलांची दुरुस्ती करण्याची मागणी केली. तिवसा तालुक्यातील सर्व पूल आणि रस्त्यांचे ऑडिट करून नवीन बांधकामे व दुरुस्ती हाती घ्यावी, असेही म्हटले आहे. ग्रामीण भागातील दळणवळण सुरक्षित होण्यासाठी संबंधित विभागाने तातडीने कार्यवाही करावी, अशी आग्रही भूमिका यावेळी मांडण्यात आली.