छत्रपती संभाजीनगरमध्ये भीषण अपघात:कंटेनर आणि आयशरची समोरासमोर धडक, दोन्ही चालकांचा मृत्यू

छत्रपती संभाजीनगर जिल्ह्यातील शेकटा-इसारवाडी महामार्गावरील शिवपूर गावाच्या शिवारात एक भीषण अपघात घडला असून, यामध्ये दोन चालकांचा जागीच मृत्यू झाला आहे. भरधाव वेगाने येणारा कंटेनर आणि आयशर ट्रक यांच्यात झालेल्या या समोरासमोर धडकेत दोन्ही वाहनांच्या दर्शनी भागाचा अक्षरशः चक्काचूर झाला आहे. ही धडक इतकी जोरदार होती की दोन्ही वाहनांचे प्रचंड नुकसान झाले आणि दोन्ही वाहनचालकांना प्राण गमवावे लागले, ज्यामुळे या घटनेने परिसरात मोठी खळबळ उडाली आहे. या अपघाताची धडक इतकी भीषण होती की, दोन्ही चालक आपल्या वाहनांच्या केबिनमध्ये गंभीररीत्या अडकून पडले होते. स्थानिक नागरिकांनी त्यांना बाहेर काढण्यासाठी तातडीने शर्थीचे प्रयत्न केले, मात्र गंभीर दुखापत झाल्यामुळे त्यांचा जीव वाचू शकला नाही. या घटनेनंतर महामार्गावरील वाहतूक काही काळ विस्कळीत झाली होती. परंतु पोलिसांनी त्वरित घटनास्थळी धाव घेत पंचनामा केला आणि मृतदेह उत्तरीय तपासणीसाठी रुग्णालयात रवाना करून वाहतूक पूर्ववत केली. अहिल्यानगरमध्ये भरधाव कारचा थरार; चार रिक्षांसह घराला दिली धडक अहिल्यानगर शहरातील बालिकाश्रम रोडवरील ढोरवस्ती परिसरात मध्यरात्री २.३० वाजेच्या सुमारास एका भरधाव इनोव्हा कारने भीषण धुमाकूळ घातला. नियंत्रण सुटलेल्या या कारने रस्त्याकडेला उभ्या असलेल्या चार रिक्षा, एक मोटारसायकल आणि थेट एका घराला जोरदार धडक दिली. ही धडक इतकी भीषण होती की, सर्व वाहनांचे प्रचंड नुकसान झाले असून घराची भिंतही कोसळली आहे. सुदैवाने, ही घटना मध्यरात्री घडल्याने मोठी जीवितहानी टळली असली तरी परिसरात भीतीचे वातावरण पसरले आहे. याप्रकरणी तोफखाना पोलिसांनी कार चालक शुभम पेवाल याच्याविरुद्ध गुन्हा दाखल केला असून पुढील कायदेशीर कारवाई सुरू आहे.